Dünya nüvə fəlakəti ilə üz-üzə...

Tarix: 02.08.2016 / 02:57
Bölmə: Dünya

Rusiya və Qərb ölkələri arasında artan ziddiyyətlər fonunda tərəflərin bir-birini hərbi güc tətbiqi ilə hədələməsi getdikcə daha geniş vüsət alır. Burada məsələnin narahatlıq doğuran tərəflərindən biri odur ki, belə təhdidlər zamanı nüvə silahlarının adı get-gedə daha çox səslənir. Özü də hər iki tərəfdən. Belə ki, bu günlərdə Böyük Britaniyanın baş naziri Tereza Mey Slovakiyaya səfəri çərçivəsində Rusiya ilə yaranan ziddiyyətlərə də toxunub.

O, paytaxt Bratislavada keçirdiyi mətbuat konfransı zamanı Moskvanın qorxudulması üçün nüvə silahından istifadə etməyə hazır olduğunu bildirib. Tereza Mey Rusiyanı Şimali Koreya ilə yanaşı ciddi təhlükə mənbəyi adlandırıb. Bu arada isə məlum oldu ki, Mey Böyük Britaniyanın nüvə potensialını müasirləşdirmək, xüsusi halda "Traydent" raketləri ilə təchiz edilmiş atom sualtı gəmilərini yeniləmək niyyətindədir.

Rusiya Federasiya Şurası müdafiə və təhlükəsizlik üzrə komitənin sədr müavini Frans Klinseviç isə Tereza Meyə Rusiyanı nüvə silahı ilə hədələməməyi məsləhət görüb. Senator Birləşmiş Krallığın hərbi baxımdan Rusiya üçün heç bir təhlükə yaratmadığını bildirib: "Rusiyada 20 min müxtəlif nüvə döyüş sursatı var. Bizdə onların çatdırılması üçün çox gözəl vasitələr var. Bu heç kəsdən qorxmamaq üçün üçün kifayət edir".

Yaranmış durumda, ABŞ başda olmaqla, NATO Şərqi Avropada raketdən müdafiə sisteminin yerləşdirilməsini sürətləndirmək istəyir. Bu vəziyyət isə Moskvanı daha çox qəzəbləndirir. Prezident Vladimir Putin açıq şəkildə xəbərdarlıq edib ki, Polşa və Rumıniya Rusiya raketlərinin hədəfinə çevriləcək. Onun sözlərinə görə, Moskva dəfələrlə xəbərdarlıq edib ki, cavab tədbirləri görməli olacaq. Lakin Vaşinqton və müttəfiqləri bu xəbərdarlığa məhəl qoymur. Putin isə bildirir":Dünənə qədər Rumıniya ərazisinin bir hissəsində hədəfdə olmağın nə demək olduğunu dərk etmirdilərsə, biz bu gün öz təhlükəsizliyimizi təmin etmək üçün müəyyən tədbirlər görməli olacağıq. Bu xəbərdarlıq Polşaya da aiddir". Putin deyib ki, ABŞ Avropada raketdən müdafiə sisteminin elementlərinin yerləşdirilməsinin Rusiyaya qarşı yönəlmədiyini deyir, ancaq buna heç kim inanmır":Biz 2000-ci illərin əvvəllərindən təkrarlayrıq ki, cavab tədbirləri görməyə məcbur olacağıq. Lakin heç kim bizi eşitmir. Bizimlə danışıqlar aparmaq istəyən yoxdur".

ABŞ generalları isə Rusiya ilə hesablaşmağın zəruri olduğunu bildirir. NATO-nun Avropa Komandanlığının rəhbəri Kertis Skaparotti bu fonda alyans üzvlərinin hərbi xərclərinin azlığından şikayətlənib. O bildirib ki, ittifaqa daxil olan ölkələr ümumi daxili məhsulun 2 faizindən daha az vəsaiti müdafiəyə xərcləyəcəyi halda, NATO özünün operativ silahlı qüvvələrini müasirləşdirə bilməyəcək. General qeyd edib ki, Rusiya son zamanlar orduda silahların müasirləşməsini uğurla həyata keçirib: "Rusiya qayıtdı. Görünür ki, onlar müasirləşməni həyata keçirərək öz güclərini yenidən təşkil edirlər. Yəni qüvvələr az, amma daha peşəkar". Skaparotti, həmçinin, Rusiya tərəfindən Suriyada döyüşçülərə qarşı yüksək dəqiqlikli silahının müvəffəqiyyətlə istifadəsini xatırladıb":Bizim rəqibimiz var. Ona çox ciddi yanaşmaq lazımdır".

Bu arada Rusiyanın ən yeni Tu-214R kəşfiyyat təyyarəsi Suriyadakı Hmeymim aviabazasına enib. "Flightradar24" saytı müəyyən edib ki, təyyarə Moskva ətrafındakı Çkalovsk aerodromundan havaya qalxıb, Xəzər dənizinin üzərindən uçub və İranın hava sahəsinə daxil olub, İraqın mərkəzi hissəsindən uçaraq Suriyaya enib. Bu, Rusiya ordusunun sərəncamına hələ sınaq üçün verilmiş ikinci Tu-214R tipli kəşfiyyat təyyarəsidir. Ötən ilin iyununda təyyarə Ukrayna sərhədləri yaxınında görünüb, daha sonra Baltik ölkələri və Finlandiya sahillərində uçub. Tu-214R kompleks radiotexniki və optik-elektron kəşfyyat təyyarəsidir. Təyyarə çoxtezlikli radiotexniki komplekslə təchiz olunub. Komleksə bir neçə radar daxildir və həm passiv, həm də aktiv rejimdə kəşfiyyat apara, radiodanışıqları qeydə ala bilir.

Habelə, təyyarənin optik-elektron kəşfiyyat kompleksi yer səthindəki bütün obyektləri izləməyə imkan verir. ABŞ Silahlı Qüvvələri Mərkəzi Komandanlığının (CENTCOM) rəhbəri, general Cosep Votel qeyd edib ki, Amerika hərbçiləri ABŞ administrasiyasından uyğun olan göstərişlər alarsa, Rusiya ilə Suriya üzrə işlərini "növbəti səviyyəyə" keçirməyə hazır olacaqlar.

Növbəti səviyyə isə tərəflər arasında açıq qarşıdurma deməkdir. Özü də yuxarıda səslənən fikirlərdən belə bəlli olur ki, bu qarşıdurma zamanı nüvə silahlarından istifadə də istisna deyil.