ABŞ Baş prokuroru Todd Blanş bildirib ki, Ədliyyə Nazirliyi Avropa ölkələrində terror hücumları törətmək üçün insanları cəlb edən və ABŞ-da rusiyalı dissidentin öldürülməsini planlaşdıran Rusiya kəşfiyyat şəbəkəsinin beş üzvünə qarşı ittihamlar irəli sürüb.
"Amerikanın düşmənlərinin Amerika torpağında zorakılıq və terror törətməsinin qarşısını almaq bizim işimizdir. Və biz məhz bunu FTB və Ədliyyə Nazirliyi prokurorlarımızın işi sayəsində edirik" – deyə Baş prokuror bildirib.
Blanş şübhəlilərin Rusiya kəşfiyyatı üçün işlədiyini və dünyanın müxtəlif yerlərində bir sıra sui-qəsdlər planlaşdırdığını deyib. O, qrupun xüsusilə Vaşinqtonda olduğuna inandıqları "rus dissidenti"nə hücum hazırladığını bildirib.
İşə hazırda Nyu-Yorkun Cənub Dairəsi üzrə ABŞ Rayon Məhkəməsində baxılır.
Açıqlanmamış ittihamnaməyə görə, rus agentləri ən azı 2024-cü ildən bəri Rusiya kəşfiyyat xidmətləri üçün çalışır və sifarişli qətllərin və terror hücumlarının təşkilində ixtisaslaşıblar.
"RIS Şəbəkəsi Rusiya Federasiyasının xarici hücumlar, qətl də daxil olmaqla həyata keçirmək üçün istifadə etdiyi şəbəkənin bir qoludur və diqqəti rusiyalı müxaliflərə və ölkədən qaçanlara, son zamanlar isə Ukraynanın müttəfiqləri kimi qəbul edilən ölkələrə yönəldiblər" – deyə ABŞ Ədliyyə Nazirliyinin mətbuat açıqlamasında bildirilir.
İstintaqı aparanlar hesab edir ki, kəşfiyyat şəbəkəsinin liderlərini 63 yaşlı keçmiş Rusiya kəşfiyyat polkovniki Yuri Xramyev və onun 27 yaşlı oğlu, Federal Təhlükəsizlik Xidmətinin (FSB) zabiti Kirill Xramyevdir. Rusiyada yaşayan 35 yaşlı Kuba vətəndaşı Oemis Romaqoza Durruti də şəbəkə rəhbərləri arasında yer alır.
Digər iki təqsirləndirilən şəxs, 35 yaşlı Kuba vətəndaşı Yaidel Delqado Suarez və 22 yaşlı Venesuela vətəndaşı Angel Eduardo Kastro, ABŞ-da potensial agentlər tapmaq və işə götürmək vəzifəsini daşıyırlar.
ABŞ-ın Milli Təhlükəsizlik üzrə Baş Prokurorunun köməkçisi Con Eyzenberq, bu təqsirləndirilən şəxslərin ABŞ-a qədər uzanan qlobal sui-qəsd şəbəkəsinin bir hissəsi kimi fəaliyyət göstərdiyini və Kremlin göstərişi ilə ABŞ vətəndaşlarını və əcnəbiləri sui-qəsdlər həyata keçirmək üçün işə cəlb etməyə çalışdıqlarını bildirib.
Müstəntiqlərin sözlərinə görə, 2026-cı ilin yayında Rusiya agentləri tanınmış rusiyalı dissidentin qətlini təşkil etmək üçün bir ABŞ vətəndaşını işə əməkdaşlığa cəlb ediblər və ona müşahidə üçün 1000-1500 ABŞ dolları, qətl üçün isə 40.000 ABŞ dolları təklif ediblər. İşə götürülən şəxs sui-qəsdi şəxsən həyata keçirməkdən imtina etdikdən sonra, onu işə cəlb edənlər ondan işi yerinə yetirmək üçün başqa insanları tapıb-tapa bilməyəcəyini soruşublar.
Bundan əlavə, ötən il şəbəkə rusların “pis adam” adlandırdığı və Rusiya haqqında "yalan danışan" bir nəfəri izləmək üçün Litvada bir ABŞ vətəndaşını əməkdaşlığa cəlb ediblər. Daha sonra polkovnik Yuri Xramyev amerikalıya rus dissidenti "benzin şüşəsi atmaqla" və ya "bıçaqla" öldürmək üçün 25.000 ABŞ dolları təklif edib.
Rədd cavabından sonra Xramyev amerikalıya ərzaq anbarlarını yandırmaq və ya elektrik yarımstansiyalarına yandırıcı maddələr atmaqla bağlı "daha sadə iş" təklif edib. Rusiya kəşfiyyat zabiti hədəflərinin "Ukraynaya kömək edən bütün ölkələr" olduğunu vurğulayıb və böyük məbləğdə pul vəd edib.
İstintaq həmçinin müəyyən edib ki, Kuba vətəndaşı olan Durruti 2024-cü ilin iyun ayında Çexiyanın paytaxtı Praqada bir hücumu və həmin ilin sentyabr ayında Litvada başqa bir terror hücumuna hazırlığı koordinasiya edib.
"Bugünkü ittiham aktında ittiham olunan Rusiya tərəfindən idarə olunan şəbəkə həyasız, aqressiv və genişmiqyaslıdır və təqsirləndirilən şəxslərə qarşı irəli sürülən ittihamlar aydın bir mesajdır: “Harada olmağınızdan və kimin üçün çalışmağınızdan asılı olmayaraq, cinayətlərinizə görə sizi araşdıracaq və məsuliyyətə cəlb edəcəyik" – deyə Nyu-Yorkun Cənub Dairəsi üzrə ABŞ prokuroru Ceymi Makdonald bildirib.
Beş şübhəlinin hamısı hazırda azadlıqda olduğu bildirilir.
Məsələyə münasibət bildirən Rusiya prezidentinin mətbuat katibi Dmitri Peskov isə bildirib ki, Kreml, sübutlar ortaya çıxana qədər ABŞ Ədliyyə Nazirliyinin Rusiya kəşfiyyat orqanları ilə əməkdaşlıq etdiyi iddia edilən şəxslərlə bağlı araşdırması ilə bağlı mediada yayılan məlumatlara şərh verməyi zəruri hesab etmir.
"Hər hansı bir konkret arqumentlərə əsaslanan tutarlı dəlil eşitməyincə və ya görməyincə, bu xəbərə şərh verməyi zəruri hesab etmirik" – deyə Peskov ABŞ Ədliyyə Nazirliyinin Rusiya kəşfiyyat orqanları ilə əməkdaşlıq etdiyi iddia edilən şəxslərlə bağlı araşdırması ilə bağlı mediada yayılan xəbərlərə münasibət bildirmək istəyinə cavab olaraq jurnalistlərə bildirib.
Tahir TAĞIYEV
