ABŞ Konqresindəki Demokratlar, rusiyalı oliqarxın Trampın oğlunun toy mərasimləri üçün yüz minlərlə dollar ödədiyi barədə xəbərlərdən sonra araşdırmalara başlayıb. “Reuters”in məlumatına görə, Demokratlar bu addımı, ProPublica-nın araşdırmasından sonra atıb. Araşdırmada varlı rusiyalı iş adamı və Beynəlxalq Boks Assosiasiyasının (IBA) prezidenti Umar Kremlevin may ayında Baham adalarında Tramp Jr.ın toy mərasimlərinin xərclərini ödədiyini ortaya çıxarıb. Araşdırmaçılar belə qənaətə gəlib ki, Kremlev Trampın toy xərclərini ödəmək üçün yüz minlərlə dollar ayırmış ola bilər.
Həmçinin Kremlevin Rusiya hökuməti ilə yaxın əlaqələri vurğulanırır.
"Rusiyalı oliqarx və Vladimir Putinin dostu Prezidentin oğluna niyə maddi dəstək verir? Umar Kremlev Baham adalarında keçirilən bu üç günlük toyu maliyyələşdirmək müqabilində nə gözləyir?" – deyə konqresmen Robert Qarsiya bildirib.
Qarsiya hazırda Nümayəndələr Palatasının Nəzarət və Hökumət İslahatları Komitəsində ən yüksək vəzifədə çalışan demokrat üzvlərdən biridir və noyabr ayında keçiriləcək ara seçkilərdə onun partiyası Nümayəndələr Palatasına nəzarəti qazanarsa, sədr vəzifəsini icra edəcək.
ABŞ prezidentinin oğlu şərh verməkdən imtina edib, həyat yoldaşı Bettina isə 14 sentyabrda İnstaqramda paylaşım edərək Kremlevin "qeyri-adi dərəcədə səxavətli toy hədiyyəsi" edən bir dost olduğunu bildirib və toyun özünə deyil, sonrakı iki əyləncəyə pul ödədiyini vurğulayıb.
Araşdırmalar və hadisə ilə tanış mənbələrə istinadən məlumat verən ProPublica-nın məlumatına görə, rusiyalı oliqarx Kremlev şəxsi adanın icarəsindən tutmuş atəşfəşanlığa qədər yüz minlərlə dollarlıq toy xərclərini öz üzərinə götürüb. Tramp Jr.ın sözçüsü ödənişi açıq şəkildə təkzib etməsə də, Kremlevin "şəxsi dostu" olduğunu bildirib.
Oğlunun toyunda iştirak etməyən Tramp özü Kremlevi tanımadığını və toy ətrafındakı mübahisələrin "yersiz" olduğunu bildirib.
Qarsiya və Nümayəndələr Palatasındakı digər aparıcı demokratlar, prezidentin ikinci müddətinin 2025-ci ilin yanvar ayında başlamasından bəri ortaya çıxan Tramp və ailəsi ilə bağlı araşdırmalar hazırlayırlar.
Nyu-Yorkdan olan senator, Demokratlarlar Partiyasının Senat lideri Çak Şumer toy mərasiminin təşkilini "çox korrupsiyalaşmış, çox əxlaqsız və milli təhlükəsizliyimizi təhlükə altına alan" mərasim adlandırıb. "Siz sadəcə sizə hədiyyə verən əmioğlu ilə deyil, bir rusiyalı oliqarxla işləyirsiniz... bəzən toy hədiyyəsi xarici avtokratın rüşvəti ola bilər", - deyə o vurğulayıb.
Tahir TAĞIYEV
