Vaşinqtonda yerləşən Elm və Beynəlxalq Təhlükəsizlik İnstitutunun (İŞİD) yeni hesabatına görə, İranın nüvə proqramı ilə əlaqəli əvvəllər məlum olmayan yeraltı bir obyekt var.
Qeyd edilir ki, obyekt Nətənz nüvə zənginləşdirmə kompleksinin yaxınlığında yerləşir. Mütəxəssislərin fikrincə, obyekt, çox güman ki, nüvə silahı istehsalında istifadə üçün uranın zənginləşdirilməsi ilə əlaqəlidir.
"İnstitut, Natanz nüvə kompleksinin ərazisində, ehtimal ki, Natanz yanacaq zənginləşdirmə müəssisəsində genişmiqyaslı uran zənginləşdirilməsi üçün uran heksaflüoridini saxlamaq üçün tikilmiş ayrıca bir yeraltı bunker aşkar edib. Bunker 2010-2017-ci illər arasında inşa edilib və tikinti işlərinin əsas hissəsi 2015-2017-ci illər arasında aparılıb" – deyə hesabatda bildirilir.
Araşdırma göstərir ki, obyekt nə ötən ilin iyun ayında ABŞ və İsrailin İranın nüvə mərkəzlərinə edilən hücumları zamanı, nə də İrana qarşı hazırkı hərbi kampaniya zamanı zərər görməyib.
"Görünür, obyekt nə 2025-ci ildə, nə də 2026-cı ildə hərbi əməliyyatların hədəfi olmayıb. 2025-ci ilin iyun ayında müharibədən sonra mövcud peyk görüntülərində obyektdə (tikinti) avadanlıqlarının heç bir fəaliyyəti müşahidə edilməyib", - deyə ekspertlər qeyd ediblər.
Bildirilir ki, gizli obyektin mövcudluğu ilə bağlı ortaya çıxan məlumatlar İranın nüvə imkanlarının 2025 və 2026-cı illərdə iki ABŞ-İsrail hərbi əməliyyatı zamanı məhv edilib-edilməməsi ilə bağlı yeni narahatlıqlar doğurur.
Tahir TAĞIYEV
