Rusiyanın yeni nəsil kruiz raketi "Banderol" Ukraynanın Qara dəniz sahillərini ticarət gəmiləri üçün faktiki olaraq keçilməz hala gətirib. Britaniyanın "The Telegraph" qəzetinin məlumatına görə, iyulun sonunda kütləvi istehsalına başlanan bu raketlər Ukraynanın həyati əhəmiyyətli liman şəhərləri olan Odessa və Çornomorskda ticarət dəniz nəqliyyatını faktiki olaraq dayandırıb.
Məlumata görə, Rusiyanın "Banderol" qanadlı raketləri Qara dənizin şimal-qərb hissəsini kommersiya gəmiləri üçün yüksək riskli əraziyə çevirib. Raketlər kütləvi istehsala başlandıqdan bəri, Ukraynanın iki ən böyük limanı olan Odessa və Çornomorskda lövbər salan və ya oradan yola düşən kommersiya gəmilərinin sayında kəskin azalma müşahidə olunub.
Qəzet bu vəziyyəti "Rusiyanın Qara dənizdəki dominantlığını möhkəmləndirən və Ukraynanın dəniz ticarətini hədəf alan strateji addımı" kimi şərh edir.
Rusiya Müdafiə Nazirliyinin açıqlamalarına görə, “Banderol” kiçik, yüksək dəqiqlikli qanadlı raketdir. Onun ən diqqət çəkən xüsusiyyəti aşağı hündürlüklərdə səssizcə uçmaq qabiliyyətidir ki, bu da ənənəvi hava hücumundan müdafiə sistemlərində aşkarlamasını çətinləşdirir.
Hərbi analitiklər qeyd edirlər ki, "Banderol" kimi reaktiv mühərrikli pilotsuz uçuş aparatlarının və kiçik qanadlı raketlərin birgə istifadəsi Ukraynanın hava hücumundan müdafiə sistemləri üçün ciddi problem yaradır. Bu cür silahların çoxlu sayda olması və aşağı hündürlüklərdə müxtəlif marşrutlardan hücum etmək qabiliyyətinə görə mövcud hava hücumundan müdafiə sistemlərinin işini çətinləşdirir.
Eyni zamanda hücumlar Ukraynanın onsuz da müharibə şəraitində olan iqtisadiyyatına yeni bir zərbə vurur. Ukrayna ixracatı, əsasən kənd təsərrüfatı məhsulları və metallar üçün Qara dəniz limanlarından çox asılı idi. Bu limanların faktiki olaraq blokadası ölkənin ixrac gəlirlərini daha da azaldır və qlobal ərzaq qiymətlərinə təzyiq göstərir.
Rusiyanın limanları "Banderol" raketləri ilə hədəfə alması Ukraynanın Rusiya ərazisinin dərinliklərinə dron hücumlarını artırmasından sonra baş verib. Moskva bu hücumları Ukraynanın logistika və hərbi infrastrukturuna qarşı "qisas" kimi təsvir edir.
Qara dənizdə ticarət gəmilərinə edilən hücumların son zamanlar artması beynəlxalq ictimaiyyətdə narahatlıq doğurub və Türkiyə kimi regional ölkələr bütün tərəfləri gərginliyi azaltmağa çağırıb. Lakin Rusiyanın bu yeni raket sisteminin yerləşdirilməsi regionda dəniz təhlükəsizliyi böhranının daha da dərinləşə biləcəyini göstərir.
Tahir TAĞIYEV
