NATO Asiya-Sakit Okean bölgəsinə nüfuz edir və orada yeni silahlar yerləşdirmək planları Rusiya üçün təhlükə yaradır. Bunu Rusiya Prezidenti Vladimir Putin Cənubi Saxalində Sakit Okean Donanması komandanlığı ilə görüş zamanı bildirib.
"Bu bölgədə münaqişə potensialı artır. NATO buraya nüfuz edir. Burada hərbi-siyasi bloklar yaradılır və ölkəmiz üçün təhlükə yaradan yeni silah sistemləri yerləşdirilir" - deyən Putinin sözlərinə görə, gərginlik təkcə Asiya-Sakit okean regionunda deyil, həm də qonşu Arktika regionunda artır.
O əlavə edib ki, Yaponiya Ukraynadakı münaqişənin səbəblərini araşdırmadan Rusiyaya qarşı səbəbsiz sanksiyalar tətbiq edib.
Putin qeyd edib ki, "Rusiya Yaponiyanı təhdid etmir və Moskvanın Tokioya qarşı heç bir iddiası yoxdur. Yaponiyanın Kuril adaları ilə bağlı Rusiyaya qarşı iddiaları var, baxmayaraq ki, bu iddialar İkinci Dünya Müharibəsindən bəri beynəlxalq sənədlərdə Rusiya üçün reallıq kimi təsbit edilib. Rusiyanın Sindzo Abe və digər Yaponiya liderləri ilə konstruktiv münasibətləri var idi, lakin indi Tokio mövqeyini dəyişib".
Putin Qərb ölkələrinin Rusiya gəmilərinin hərəkətini məhdudlaşdırmasına da münasibət bildirib. Rusiya lideri bildirib ki, bu ölkələr son zamanlar "gəmilərimizi ələ keçirmək və bizdən qarət edilmiş malları satmaq" ehtimalını gündəmə gətiriblər: "Bəzi ölkələrin beynəlxalq dəniz qanunlarını pozaraq iqtisadi fəaliyyətlə məşğul olan gəmilərimizin naviqasiyasını məhdudlaşdırmağa çalışdığını görürük. Son zamanlar hətta gəmilərimizi ələ keçirib bizdən oğurladıqları malları satmağı planlaşdırırlar. Əlbəttə ki, bu, piratçılıq və soyğunçuluqdan başqa bir şey deyil".
Rusiya prezidenti bu təcrübələrin həqiqətən tətbiq olunacağı təqdirdə Moskvanın qisas almaq məcburiyyətində qalacağını bildirib və qisasın mütləq Rusiya gəmilərinə planlaşdırılan hücumların keçirildiyi ərazilərdə baş verməsinin şərt olmadığını vurğulayıb.
"Əgər bu təcrübələr həqiqətən tətbiq olunarsa, biz də eyni şəkildə cavab verməli olacağıq. Uyğun hesab etdiyimiz yerdə cavab verəcəyik. Üstəlik, bunun gəmilərimizə və dəniz nəqliyyatına hücumların planlaşdırıldığı sularda baş verməsi də vacib deyil. Biz bunu zəruri və uyğun hesab etdiyimiz yerdə reallaşdıra bilərik, istənilən bir yerdə. Mən bu məsələ ilə bağlı Rusiya Müdafiə Nazirliyinə göstərişlər vermişəm" – deyə Putin bildirib.
O, Rusiyanın ticarət gəmilərinin təkcə eyni sularda deyil, həm də Sakit Okean da daxil olmaqla istənilən yerdə ələ keçirilməsinə eyni dərəcədə cavab verəcəyinə söz verib.
Tahir TAĞIYEV
