2022-ci ilin fevral ayında Ukraynada müharibənin başlamasından bəri Almaniya 80-dən çox rusiyalı diplomatı ölkədən çıxarıb. “Bild”in məlumatına görə, onların əksəriyyəti diplomatik himayə altında agent kimi işləməkdə şübhəli bilinirdi. Bu, ilk növbədə Berlindəki Rusiya səfirliyinin əməkdaşlarına aiddir.
Almaniya Xarici İşlər Nazirliyi nəşrə bildirib ki, müharibənin başlanğıcından bəri Rusiya səfirliyindəki işçilərin sayı "əhəmiyyətli dərəcədə azaldılıb". Rusiyalı diplomatın sonuncu dəfə ölkədən çıxarılması 2026-cı ilin yanvar ayında baş verib.
Bundan əlavə, Daxili İşlər Nazirliyinin nəşrə verdiyi məlumata görə, 2022-ci ildən bəri Almaniya 313 Rusiya vətəndaşını deportasiya edib. Bu rəqəm son bir neçə ildə ölkəni tərk edən Rusiya vətəndaşlarının - diplomatların və müxtəlif səbəblərdən deportasiya edilən digər şəxslərin ümumi sayını göstərir.
Rusiya diplomatlarının ən böyük deportasiyası 2022-ci ilin aprel ayında Kiyev yaxınlığındakı Buçada mülki şəxslərin kütləvi şəkildə qətlə yetirilməsinin aşkarlanmasından sonra baş verib. Daha sonra Almaniya Rusiya diplomatik missiyasının 40 əməkdaşını persona non-qrata elan edib.
Rusiya kəşfiyyatının şübhəli fəaliyyətləri ilə bağlı ən son işlərdən biri İlona V.-nin işidir. “Bild”in məlumatına görə, qadın 2023-cü ilin noyabr ayından bəri Rusiya kəşfiyyat xidmətinə işləməkdə şübhəli bilinir. Həbs olunduqdan sonra, guya onun rəhbəri kimi fəaliyyət göstərən Rusiya səfirliyinin əməkdaşı olduğu iddia edilən şəxs Almaniyanı tərk edib.
Almaniya Xarici İşlər Nazirliyi daha sonra bildirib ki, hakimiyyət orqanları Almaniya ərazisində "xüsusən də diplomatik status adı altında" casusluq fəaliyyətlərinə dözməyəcəklər. Rusiya səfirinə işçinin ölkədən çıxarılması barədə məlumat verilib.
Rusiyanın hazırda Almaniyada üç diplomatik nümayəndəliyi var: Berlində səfirlik, Bonnda baş konsulluq və Nürnberqdə fəxri konsulluq.
Tahir TAĞIYEV
