ABŞ prezidenti Donald Tramp və müdafiə naziri Pit Heqsetin Kemp Deviddə keçirilən bir toplantıda İrana qarşı müharibədə raket və sursat ehtiyatlarının kəskin şəkildə tükənməsi ilə bağlı qızğın mübahisə etdiyi iddia edilir.
“The Washington Post” qəzetinin məlumatına görə, Tramp Heqseti raket ehtiyatlarının tükənməsi və nəticədə yaranan raket çatışmazlığı ilə bağlı sorğu-sual edib. İran müharibəsi və hərbi ehtiyatların vəziyyəti barədə yanlış məlumatlandırıldığını bildirən Tramp, Heqsetdən izahat tələb edib və əvvəllər sursat böhranının "həll edildiyi" barədə məlumatlandırıldığını vurğulayıb.
İrana qarşı hərbi əməliyyatların ən qızğın tərəfdarlarından biri olan Heqset, təchizat çatışmazlığına və nəticədə yaranan rabitə xətalarına görə müavini Stiven Feynberqi günahlandırıb.
Dəfələrlə mediada bildirilib ki, Trampın İrana qarşı planlaşdırılan yeni hava əməliyyatlarını dayandırmaq qərarında əsas amil uzun mənzilli idarə olunan raketlərin, eləcə də Patriot və THAAD hava hücumundan müdafiə raketlərinin çatışmazlığı olub. Münaqişənin ilk həftələrindən bəri 850-dən çox Tomahawk və 1300-dən çox taktiki ballistik raketdən istifadə edildiyi və Ukraynanın da tələb etdiyi ATACM ehtiyatlarının tükənmək üzrə olduğu bildirilib.
Ağ Evin mətbuat katibi Karolin Livitt və Pentaqonun sözçüsü Şon Parnell xəbərlərin yalan olduğunu bildiriblər və iddiaları qəti şəkildə təkzib ediblər.
ABŞ ordusunun Yaxın Şərqdə çox sayda sursat istifadə etməsi qlobal tarazlığa da təsir göstərir. Müdafiə ehtiyatlarının azalması səbəbindən Ukraynaya hava hücumundan müdafiə dəstəyinin demək olar ki, dayandığı və ABŞ ordusunun yaxınlaşan təhdidlərə cavab olaraq raket yerləşdirmə prosedurlarını dəyişdirməyə məcbur olduğu qeyd edilir.
Digər tərəfdən, Pentaqonun ehtiyatlarının artırılması üçün əlavə 67 milyard dollar tələbinin və rekord həddə çatan 1,5 trilyon dollarlıq müdafiə büdcəsi təklifinin Konqresdəki siyasi çıxılmaz vəziyyət səbəbindən təsdiqlənə bilmədiyi və yeni raket istehsalının ən azı iki il çəkəcəyi vurğulanır.
Tahir TAĞIYEV
