30 iyul gecəsi Ukrayna Silahlı Qüvvələri Rusiyanın cənubundakı ən böyük limanı olan Krasnodar diyarında Qara dəniz sahilindəki Taman limanına hücum edib. Liman infrastrukturuna ziyan dəyib və itkilər olub.
NASA Firms xidməti Taman limanında və OTEKO qrupu tərəfindən idarə olunan böyük özəl dəniz neft terminalı Tamanneftegaz-da yanğınlar qeydə alıb. Sonuncunun ildə təxminən 20 milyon ton tutumu, çən anbarının tutumu isə 640 min kubmetrdir. Həmçinin, yağ və yağ məhsulları istehsal edən və ixrac edən EFKO Food Ingredients şirkətinin müəssisələrində də yanğınlar qeydə alınıb.
“Reuters” mənbələri bitki yağları emalı ilə məşğul olan EFKO terminalına edilən hücumu təsdiqləyib və ildə 5,5 milyon ton tutuma malik Taman Taxıl Terminal Kompleksinə (TGC) ziyan dəydiyini bildirib.
Taman Limanı, Kerç boğazının buzsuz sularında yerləşən Rusiyanın cənubundakı əsas nəqliyyat mərkəzidir. O, neft məhsulları, mayeləşdirilmiş neft qazı, kömür, kükürd, taxıl, bitki yağları və mineral gübrələr ixrac edir. Limanın ümumi gücü ildə 90 milyon tonu keçərək, Azov-Qara dəniz hövzəsində yük dövriyyəsinə görə Novorossiyskdən sonra ikinci yerdədir.
Taman limanına 2026-cı ilin fevral ayında da hücum omuşdu. Rəsmi məlumatlara görə, iki nəfər yaralanıb və bir neft çəni yanıb. 2025-ci ilin dekabr ayında Taman limanına edilən dron hücumu iki körpüyə, iki gəmiyə, dörd neft çəninə və bir yanacaq neft boru kəmərinə zərər vurub.
Ukrayna Silahlı Qüvvələri Novorossiyskdəki Xəzər Boru Kəməri Konsorsiumunun dəniz terminalında da gəmilərə zərbələr endirib.
Konsorsiumun yaydığı məlumata görə, nəticədə Marşal Adaları bayrağı altında üzən "Nissos Sifnos" tankeri (göndərən "Tengizchevroil") yanğın baş verib. Heç kim xəsarət almayıb, gəmi üzən vəziyyətdə qalıb və zərərin qiymətləndirilməsi aparılır.
Limandan altı dəniz mili məsafədə yerləşən "Man adası" bayrağı altında üzən "Marathi" tankerinə də hücum edilib. Xəzər Boru Kəməri Konsorsiumunda isə neftin yüklənməsi dayandırılıb.
Tahir TAĞIYEV
