Rusiya qoşunları gecə Ukraynaya raketlər və dronlarla kütləvi hücuma keçib. Ukrayna Dövlət Fövqəladə Hallar Xidmətinin (SES) məlumatına görə, Kiyevdə hücum nəticəsində bir nəfər ölüb, iki nəfər yaralanıb. Svyatoşinski rayonunda beşmərtəbəli qeyri-yaşayış binası və qaraj kooperativi, Obolonski rayonundakı bazar isə yanğına məruz qalıb.
Kiyev bölgəsində fərdi ev dağılıb, bir uşaq da daxil olmaqla beş nəfər yaralanıb. Lvovda bir neçə partlayış baş verib, Patona və Vıqovski küçələrindəki çoxmərtəbəli yaşayış binaları yanıb. Lvov vilayətinin qubernatoru Maksim Kozitskinin sözlərinə görə, 15 nəfər yaralanıb, onlardan 14-ü xəstəxanaya yerləşdirilib. "İnsanlar Patona küçəsindəki binanın dağıntıları altında qalıb. Xilasetmə əməliyyatı davam edir. Sakinlər xilasedicilərə dağıntıları təmizləməyə kömək edirlər", - deyə Lvov meri Andrey Sadovyi yazıb.
Dnepropetrovsk vilayətinin Raduşne kəndində iki fərdi ev tamamilə dağılıb, beş ev isə zərər görüb. Bir neçə yanğın baş verib. İki uşaq da daxil olmaqla beş nəfər ölüb, səkkiz nəfər yaralanıb. Dövlət Fövqəladə Hallar Xidmətinin məlumatına görə, daha beş nəfər dağıntılar altında qala bilər. Krivoy Roq hərbi administrasiyasının rəhbəri Aleksandr Vilkul böyük bir ailə olan bütün Voronov ailəsinin yox olduğunu deyib. Poltava bölgəsində Rusiya ordusu bir şirkətin anbarına zərbə endirmək üçün dronlardan istifadə edib, deyə regional administrasiyanın rəhbəri Vitali Dyakivniç bildirib. "Təəssüf ki, bir nəfər həlak olub", o, Telegram-da yazıb. O, həmçinin Nova Poşta terminalına zərbə endirildiyini bildirib. Tələfat olmayıb.
Bundan əvvəl Ukrayna Prezidenti Vladimir Zelenski Rusiyanın daha bir böyük hava hücumuna hazırlaşdığını və bu gecə hücuma başlaya biləcəyini bildirmişdi.
Tahir TAĞIYEV
