Georgia Online xəbər verir ki, Gürcüstanın keçmiş prezidenti Mixail Saakaşvili məhkəmə iclasında bildirib ki, hətta tam təcrid olunması belə onun fikirlərini tərəfdarlarına çatdırmağa davam etməsinə mane olmayacaq.
Onun sözlərinə görə, artıq bu məqsədlə süni intellektə əsaslanan rəqəmsal avatarı yaradılır.
"Mənim süni intellekt avatarım artıq hazırlanır. Məndən daha yaxşı görünür, amma yenə də mənəm. Ən yaxşı dövründəki Mişa kimi danışır, eyni jestlərə və üz ifadələrinə malikdir və düşündüyüm hər şeylə dolu olacaq", - Saakaşvili deyib.
Keçmiş prezident həmçinin gələcəkdə azadlığa çıxacağına əminliyini ifadə edərək, vəziyyətini həbsdən sonra hakimiyyətə qayıdan bir neçə qlobal siyasətçinin vəziyyəti ilə müqayisə edib. Xüsusilə, Nelson Mandela, Braziliya prezidenti Luis İnasio Lula da Silva və Malayziyanın Baş naziri Ənvər İbrahimdən bəhs edib.
Saakaşvilinin sözlərinə görə, uzun müddət həbsdə qalması onun siyasi qayıdış ehtimalını daha da artırır. O, missiyasını hakimiyyətə şəxsi qayıdışda deyil, fərqli düşüncə tərzinə malik yeni nəsil siyasətçilərin formalaşmasında gördüyünü bildirib.
Saakaşvili həmçinin tərəfdarlarının yeni bir siyasi qüvvəni hakimiyyətə gətirə biləcəklərinə və bunun, onun sözlərinə görə, Gürcüstanın müstəqil kursunu bərpa edəcəyinə, ölkənin sürətli inkişafını təmin edəcəyinə və ədalətə nail olacağına əminliyini ifadə edib.
Tahir TAĞIYEV
