Rusiya-Ukrayna müharibəsi fonunda Kiyev daxili müdafiə sənayesi sahəsində ciddi irəliləyişlərə əldə edib. Uzaqmənzilli kamikaze dronları və qanadlı raketlər hazırlamaqla önə çıxan Ukraynanın müdafiə şirkəti "Fire Point" Putinin ən böyük kabusuna çevrilib.
Şirkətin baş direktoru İrina Terex bildirib ki, "Fire Point" Rusiyanın dərinliklərindəki hədəflərə hücumlar həyata keçirməkdə ən təsirli müdafiə şirkətlərindən birinə çevrilib.
"The Guardian" qəzetinin məlumatına görə, "Fire Point" ayda təxminən 100 uzaqmənzilli "Flamingo" kruiz raketi istehsal edir, yüzlərlə FP-1 və FP-2 sabit qanadlı kamikaze dronları isə istehsal xəttindən gündəlik çıxarılır. Şirkətin baş direktoru bildirib ki, son aylarda aparılan dərin zərbə əməliyyatlarının demək olar ki, hamısında şirkətin sursatı istifadə olunub. "Fire Point" sistemlərindən istifadə etməklə gündə orta hesabla 5-15 hücum həyata keçirilib.
İyun ayında Rusiyanın Çeboksari şəhərindəki hərbi istehsal müəssisəsinə edilən hücumda da "Flamingo" raketlərindən istifadə edildiyi bildirilir. Təxminən 1800 kilometr məsafəyə malik bu raketlərin beton mühafizəni dəlib keçə və yüksək dağıdıcı güc yaratdığı deyilir.
Şirkətin həmçinin 1000 mildən çox məsafəyə malik FP-1 PUA-larından Rusiyanın neft emalı zavodlarını hədəf alan əməliyyatlarda istifadə edilir. Bu hücumların Rusiyanın neft emalı zavodlarının istehsalını təxminən 20 faiz azaltdığı və ölkənin yanacaq təchizatında fasilələrə səbəb olduğu bildirilir.
34 yaşlı baş direktor İrina Terexin rəhbərlik etdiyi "Fire Point" şirkəti müharibənin başlanğıcından bəri sürətlə böyüyüb. Bu gün şirkət Ukraynadakı beş və Danimarkada bir fabrikdə təxminən 6000 nəfəri işlə təmin edir.
Terex həmçinin "Fire Point" şirkətinin Ukraynanın ilk yerli istehsal olan ballistik raketləri üzərində işlədiyini və ilin sonuna qədər ilk sınaq buraxılışını həyata keçirməyi hədəflədiyini açıqlayıb. Şirkət həmçinin Avropanın "Patriot" hava hücumundan müdafiə sisteminə alternativ hazırlamağı hədəfləyən "Freyja" layihəsi üçün raket və tutucu qurğuların istehsalında da iştirak edir.
ABŞ ordusunun Avropadakı keçmiş komandanı Ben Hokes də Ukraynanın illərlə davam edən işinin bəhrəsini verdiyini bildirib və əlavə edib ki, hazırlanmış sistemlər Rusiyanın hava hücumundan müdafiə sistemlərini dəf etməyə və strateji hədəfləri yüksək dəqiqliklə vurmağa qadirdir.
Müharibə zamanı əvvəlcə xarici dəstəyə asılı olan Ukrayna bu gün daxili müdafiə sənayesi ilə uzaqmənzilli hücum imkanlarını əhəmiyyətli dərəcədə artırıb. Rusiya ərazisinin dərinliklərindəki hədəfləri vura bilən "Fire Point"in raket və PUA sistemləri Moskva və Kreml lideri Vladimir Putinin ən böyük təhlükəsizlik narahatlıqlarından biri hesab olunur. Şirkət Ukraynanın müdafiə imkanlarını dəstəkləmək üçün istehsal gücünü daha da artırmağı hədəfləyir.
Tahir TAĞIYEV
