Rusiya ilə Ukrayna arasında mülki hədəflərə hücumlar artaraq davam edir. Ukraynanın Rusiya limanlarına və gəmilərinə hücumlarına cavab olaraq, Rusiyanın limanlara və gəmilərə hücumları da artmaqdadır.
Rusiyanın son günlərdə həyata keçirdiyi ən böyük hücumu isə 24 iyulda baş verib. Kiyev yaxınlığındakı hərbi təlim poliqonuna raket hücumu Ukraynanın müdafiə sənayesinə ağır zərbə vurub. Rusiya Müdafiə Nazirliyi hücumun Ukrayna və xaricdə istehsal olunmuş pilotsuz uçuş aparatlarının nümayiş etdirildiyi tədbiri hədəf aldığını bildirib. Hücum nəticəsində ən azı 10 nəfər həlak olub, təxminən 100 nəfər yaralanıb .
Ölənlər arasında Ukrayna Dövlət Mühafizə Xidmətinin Beynəlxalq Əməkdaşlıq və Strateji Kommunikasiya Mərkəzinin rəisi Valentina Savitskaya və Ukrayna xüsusi təyinatlı qüvvələrinin yüksək rütbəli zabiti Eduard Sirenko da var. Hücum zamanı Polşa müdafiə sənayesi işçisi də həlak olub. Ukrayna Prezidenti Zelensky hadisəni təhlükəsizlik pozuntusu səbəbindən "böyük səhv" adlandırıb və araşdırma aparıldığını elan edib. Tədbirin təşkilatçısının saxlandığı bildirilir.
Hücumlardan sonra açıqlama verən Zelenski kəşfiyyat mənbələrinə istinadən Rusiyanın yeni böyük hücuma hazırlaşdığını bildirib. Ukrayna lideri xəbərdarlıq edib ki, ruslar Ukraynaya yeni böyük hücum üçün raketlər hazırlayıblar. Bu hücum bu gün və ya bu həftə sonu baş verə bilər.
Rusiyapərəst rəsmilər Ukrayna Silahlı Qüvvələrinin Baş Komandanı Mixail Drapatinin Rusiya ordusu üçün "qanuni hədəf" olduğunu bəyan ediblər. Zaporojye Regional İctimai Palatasının rəhbəri Anton Bibarov-Qosudarev, "Zelenski, Drapati və digərləri ordumuz üçün qanuni hədəflərdir" deyərək Ukraynanın Melitopoldakı turizm obyektlərinə hücumuna cavab olaraq qisas əməməliyyatının mesajını verib.
Rusiyanın Ukrayna limanlarına hücumlarının bu yeni dalğası ölkənin Qara dəniz vasitəsilə həyata keçirdiyi həm hərbi, həm də kommersiya dəniz nəqliyyatını birbaşa təhdid edir. Hücumların Ukraynanın taxıl ixracına və hərbi logistika xətlərinə ciddi təsir göstərəcəyi gözlənilir. Rusiyanın yaxın günlərdə də Ukraynanın enerji infrastrukturuna oxşar əməliyyatları və hücumları davam etdirəcəyi proqnozlaşdırılır.
Tahir TAĞIYEV
