Avropa Birliyi (AB) Gürcüstanın yeganə neft zavodunu da Rusiyaya qarşı 21-ci sanksiya paketinə daxil edib. Kulevi Neft Emalı Zavodu Rusiya xam neftinin emalına görə, AB-nin sanksiyalarına məruz qalıb.
Məhdudiyyətlər 2026-cı ilin ilk altı ayında 650.000 tondan çox xam neft emal edən zavodla aparılan əməliyyatların qadağa edilməsini də nəzərdə tutur. Qeyd edilir ki, sanksiyalar şirkət Rusiya nefti ilə əməliyyatlarını dayandırmadığı təqdirdə, altı ay ərzində qüvvəyə minəcək.
İlk mərhələsi ildə 1,2 milyon ton tutuma malik olan Kulevi Neft Emalı Zavodu ilk dəfə 2025-ci ilin oktyabr ayında “RussNeft”dən xam neft almağa başlayıb. 2026-cı ilin fevral ayında isə Avropa Birliyi Rusiya neftinin təkrar ixracında potensial iştirakı və Avropa məhdudiyyətlərini aşması səbəbindən neft emalı zavodunun sanksiyalar siyahısına əlavə edilməsi imkanlarını müzakirə etməyə başlayıb.
Aİ-nin Sanksiyalar üzrə xüsusi elçisi Devid O'Sullivan Tiflisin Rusiya xam neftinin idxalına qoyulan qadağaya və Gürcüstan limanlarına tankerlərin girişinə qoyulan məhdudiyyətlərə riayət etmək öhdəliyini xatırladıb. Gürcüstan hakimiyyəti isə Kulevi limanını sanksiya tətbiq edilən Rusiya gəmiləri üçün tamamilə bağlayacağına və neftin təkrar ixracını dayandıracağına söz verib.
İyulun əvvəlində Kulevi Neft Emalı Zavodunu idarə edən Black Sea Petroleum (BSP) şirkətinin rəhbərliyi 2026-cı ilin avqust-sentyabr aylarında Rusiya neftinin alışını dayandıracağını açıqlayıb və bu qərarı "xammalın şaxələndirilməsinə" doğru addım kimi dəyərləndirib.
BSP-nin baş direktoru David Potsxveriya bildirib ki, şirkət "mövcud Rusiya tədarükünü tamamilə əvəz etmək" məqsədilə Kulevi Neft Emalı Zavodunu Türkmənistan və Qazaxıstan xam nefti ilə yanaşı, "digər alternativ mənbələrdən" neftlə təchiz etməyə başlayacaq.
Tahir TAĞIYEV
