Seul Ali Məhkəməsinin Cənubi Koreya tarixində ən böyük maliyyə hesablaşması olan və "əsrin boşanması" adlandırılan işlə bağlı çıxardığı son qərar ölkə tarixinə düşüb.
SK Group-un sahibi, milyarder Çey Te-vonun nikahdankənar münasibət və qeyri-qanuni uşağının olduğunu etiraf etməsi ilə başlayan hüquqi proses milyarder iş adamının keçmiş həyat yoldaşına rekord məbləğdə təzminat ödəməsini nəzərdə tutan qərarla yekunlaşıb.
Məhkəmə Çey Te-vonun keçmiş həyat yoldaşı Roh So-yonqa 944 milyard von (644 milyon dollar) ödəməsi barədə qərar çıxarıb. Qərarda aktivlərin qiymətləndirilməsinin 2026-cı il deyil, apellyasiya dinləməsinin başa çatdığı 2024-cü il əsasında aparılmalı olduğu bildirilib. Bu o deməkdir ki, süni intellektdən qaynaqlanan səhm qiymətlərinin artımının tam həcmi hesablamaya daxil edilməyib.
Roh məhkəmədən atası, keçmiş prezident Roh Tae-vunun ailəsinin SK Group-un böyüməsinə verdiyi töhfənin nəzərə alınmasını və ona 2026-cı ildə şirkətin dəyərinə əsasən daha yüksək pay verilməsini tələb etmişdi. Lakin Ali Məhkəmə təxminən 1 milyard dollarlıq əvvəlki qərarı ləğv edərək, bu töhfənin aktivlərin bölünməsində əsas kimi istifadə edilə bilməyəcəyinə qərar verib. Beləliklə, Cənubi Koreyanın ən çox müzakirə olunan boşanma əvvəlki qərardan daha aşağı razılaşma ilə başa çatıb.
Boşanma prosesi 1988-ci ildə evlənən və üç övladı olan cütlük, Çeyin 2015-ci ildə nikahdankənar münasibətdən övladı olduğunu açıqlamasından sonra başlayıb. Roh SK Group səhmlərinin əhəmiyyətli bir hissəsini tələb edib və bu iş Cənubi Koreyada "əsrin boşanması" kimi adlandırılıb.
Tahir TAĞIYEV
