Fransa Prezidenti Emmanuel Makronun Avropa İttifaqına daxil olmayan dövlətlərdə təhsil alan və bu ölkədə işləyən həkimlər barədə açıqlamaları gündəmin ən çox müzakirə olunan mövzularından birinə çevrilib.
Aryej bölgəsindəki Lavelane xəstəxanasına səfəri zamanı Emmanuel Makron Oran şəhərindən olan bir həkimlə söhbət zamanı Avropa İttifaqı xaricində təhsil almış həkimlərin Fransada işləməkdə çətinlik çəkməsini tənqid edib. O bildirib ki, bu hal həmin həkimlərin Fransada işləməsini və tibb sahəsində çatışmazlıqların aradan qaldırılmasına töhfə verməsini çətinləşdirir. Makron həmin həkimlərin əksəriyyətinin Əlcəzairdən gəldiyini qeyd edib və adıçəkilən ölkə hökuməti ilə sərt mövqe tutmaq istəyən şəxsləri “ruhi xəstə” adlandırıb.
Müxtəlif reaksiyalar qarşısında Fransanın Prezidenti açıqlamasını izah etməli olub. “Əhəmiyyətli olan qarşılıqlı hörmət əsasında tələbkar dialoq qurmaq və maraqlarımızı müdafiə etməkdir. Fransanın dövlət xidmətlərinin işləməsi üçün bəzən xarici vətəndaşların, xüsusilə Əlcəzairdən olanların köməyinə ehtiyac var”, - deyə o vurğulayıb.
Fransanın Respublikaçılar Partiyasının rəhbəri və prezidentliyə namizəd Brüno Rötayo Makronu bu açıqlamaya görə tənqid edib. O bildirib ki, deyilənlər hökumətin Əlcəzair siyasətindəki problemləri ört-basdır etmək üçün “saxta bəhanədir”. “Problem əlcəzairli həkimlər deyil, Fransa ərazisini tərk etmək öhdəliyi olan şəxslərdir. Əlcəzair onların ölkəyə qayıtmasını istəmir”, – deyə o diqqətə çatdırıb.
Rötayo və tərəfdarları hesab edirlər ki, “xeyirxah niyyət siyasəti” uğursuzluğa məhkumdur və Fransa liderləri buna görə ölkəni alçaltmağa, təhqir etməyə haqq qazandırmamalıdırlar.
Yelisey sarayından Prezidentin açıqlamaları ilə bağlı bildirilib ki, bu, qeyri-rəsmi və şifahi müzakirə olub. Prezident xəstəxanada təxminən 80 faizi əcnəbi həkimlərdən ibarət qrupla görüşüb. Prezidentin “ruhi xəstə” ifadəsi isə Oran şəhərində təhsil almış bir həkimlə söhbət zamanı səslənib.
Yelisey sarayının açıqlamasına görə, deyilənlər Avropa İttifaqı xaricində təhsil almış və Fransa xəstəxanalarında məhdudiyyətlərlə işləyən 20 min həkimə aiddir. Onlar ölkənin bölgələrində əvəzolunmaz rol oynayırlar. Həmin həkimlərin 70 faizdən çoxu Əlcəzair, Tunis, Suriya, Mərakeş və Livanda təhsil alanlardır.
