Avropa Birliyinin ürəyi olan Brüssel hazırda diplomatik dairələrdə təkcə "AB paytaxtı" deyil, həm də "Dünyanın casusluq mərkəzi" kimi xatırlanır. Şəhərdə hər beş diplomatdan birinin aktiv kəşfiyyat əməkdaşı olduğu təxmin edir.
Sızdırılan səs yazılarına görə, onların son qurbanı Avropa Komissiyasının prezidenti Ursula fon der Leyen olub.
“Politico Europe” un məlumatına görə, Ursula fon der Leyenin baş köməkçisi ilə bir jurnalistin arasında baş tutan telefon danışığının tam mətni internetdə sızdırılıb. Macarıstandakı keçmiş Orban tərəfdarı medianın gündəmə gətirdiyi görüşün necə və kim tərəfindən qeydə alındığı sirr olaraq qalır.
"Politico" ilə danışan mənbələrə görə, tərəflərdən hər ikisinin telefonlarında casus proqram izlərinin olmaması dinləmənin birbaşa şəbəkə üzərindən və ya qabaqcıl kəşfiyyat metodları ilə həyata keçirildiyinə dair şübhələri artırır.
Brüsseldəki Avropa Parlamentinin yaxınlığındakı məşhur yaşıl küçə işıqları, Art Deco memarlığının bir hissəsi kimi görünsə də, əslində casusluq dünyasında bədnam bir nüfuza malikdir. Ərazidəki dirəklərin illərdir kəşfiyyat xidmətləri tərəfindən dinləmə cihazları ilə doldurulduğu ehtimal edilir.
Avropa Komissiyası öz işçilərinə xəbərdarlıq mesajı verib: "Brüssel, qurumlarımızı hədəf alan yüzlərlə aktiv kəşfiyyat agenti ilə dünyanın ən böyük casusluq mərkəzlərindən biridir".
Belçika təhlükəsizlik xidmətləri şəhərdə 25 mindən çox qeydiyyatdan keçmiş diplomatın təxminən 20 faizinin casus ola biləcəyini təxmin edir. 2019-cu ildə açıqlanan məlumatlara görə, Brüsseldə ən azı 250 Çin və 200 Rusiya kəşfiyyat əməkdaşı fəal şəkildə işləyir. Əvvəllər (Justus Lipsius binası işində olduğu kimi) divarlardan ABŞ və İsrailin dinləmə cihazları çıxırdısa, bu gün Rusiya və Çin əsas şübhəlilər hesab olunur.
Bildirilir ki, şifrələnmiş mesajlar, kuryerlər və siqnal bloklayıcı otaqlar belə artıq tam təhlükəsizliyi təmin etmir.
Şəhərdə gizli dinləmələr o qədər adi hala gəlib ki, ABŞ-ın Belçikadakı keçmiş səfiri Hovard Qutman hər gecə yatmazdan əvvəl evinin damına doğru "Gecəniz xeyirə qalsın!" deyə qışqırdığını etiraf edib. Qutman bildirib ki, hər an ruslar və ya çinlilər tərəfindən dinlənildiyini hiss etmək Brüsselin reallığıdır.
NATO və AB qərargahlarının yerləşdiyi Brüssel, eyni zamanda divarların qulaqlarının olduğu, ən gizli qərarların hələ qəbul edilməmişdən əvvəl sızdırıldığı təhlükəli bir şahmat taxtasına çevrilib.
Tahir TAĞIYEV
