ABŞ Prezidenti Donald Tramp və kabinet üzvlərinin iştirakı ilə Vaşinqtonda bir oteldə təşkil edilən Ağ Ev Müxbirləri Assosiasiyasının şam yeməyi zamanı terror hadisəsi baş verib. Tramp salona daxil olduqdan bir neçə dəqiqə sonra silah səsləri eşidilib. Silah səslərindən sonra salonda çaxnaşma yaranıb və Tramp və onu müşayiət edən şəxslər Məxfi Xidmət tərəfindən hadisə yerindən dərhal təxliyə edilib. Prezident Tramp və birinci xanım Melaniya Tramp bir neçə saniyə ərzində agentlər tərəfindən otaqdan çıxarılıblar.
CBS News-a danışan mənbələrə görə, şübhəli dindirmə zamanı hədəfinin Tramp administrasiyasında çalışan rəsmilər olduğunu bildirib. Rəsmilərə yaxın mənbələrə görə, saxlanan təcavüzkar etirafında hərəkəti şüurlu şəkildə planlaşdırdığını və xüsusilə Tramp administrasiyası ilə əlaqəli şəxsləri hədəf aldığını bildirib.
Şübhəlinin üzərində ov tüfəngi, tapança və bir neçə bıçaq tapıldığını və həbs zamanı hüquq-mühafizə orqanları ilə atışmaya girdiyi bildirilir.
Məlumatlara görə, təcavüzkar Cənubi Kaliforniyadan olan müəllim və video oyun tərtibatçısıdır.
Hadisədən sonra genişmiqyaslı araşdırma başlanıb və hücumun motivasiyası və mümkün əlaqələri ətraflı araşdırılır. Hakimiyyət orqanları şübhəlinin təkbaşına hərəkət edib-etmədiyini də araşdırır.
ABŞ-da böyük ajiotaj yaradan hücum cəhdi bir daha yüksək vəzifəli siyasi fiqurların təhlükəsizliyini ön plana çıxarıb.
Federal Seçki Komissiyasının qeydlərinə görə, Allen adlı saxlanan şəxs 2024-cü ilin oktyabrında Kamala Harrisin prezidentlik kampaniyasına 25 dollar bağışlayıb.
Hakimiyyət orqanları şübhəlinin tədbirin keçirildiyi Vaşinqton Hilton Otelində qonaq olduğunu düşünür. Bildirilir ki, polis şübhəliyə məxsus bir otağı nəzarətə götürüb və içəridə nə olduğunu araşdırır.
Tahir TAĞIYEV
