İslamabad bu gün vacib diplomatik görüşə ev sahibliyi edir. Pakistanın Baş naziri Şahbaz Şərif İslamabadda İranın xarici işlər naziri Abbas Əraqçi ilə görüşüb. Regional vəziyyətin müzakirə olunduğu görüş davam edərkən, İrandan da ABŞ-a Hörmüz boğazı ilə bağlı yeni bir xəbərdarlıq gəlib.
Bu arada, Britaniya xəbər agentliyinə müsahibə verən Tramp Tehran administrasiyasının Vaşinqtonun tələblərini yerinə yetirmək üçün hərtərəfli təklif hazırladığını iddia edib.
"Onlar təklif hazırlayırlar, hələ nə olacağını bilmirəm, amma görəcəyik" deyən Tramp, İran tərəfində kiminlə danışdıqlarını isəaçıqlamayıb: "Bunu açıqlamaq istəmirəm, amma hazırda söz sahibi səlahiyyətləri olan insanlarla danışırıq".
İran mənbələri nazir Ərakçinin, Pakistanın ordu komandanının Tehrana səfəri zamanı gətirdiyi təkliflərə ölkəsinin hərtərəfli cavabını çatdırdığını bildirib. Pakistanın təhlükəsizlik mənbələri nümayəndə heyətinin Tehrandan "Amerika təklifləri"nə cavabla qayıtdığını təsdiqləyib.
Pakistanda diplomatik fəaliyyət davam edərkən, İran dövlət televiziyası ordunun bir xəbərdarlığını paylaşıb. İnqilab Keşikçilərinin Xatəm əl-Ənbiya Qərargahı ABŞ-ın bölgədəki mövcudluğunu "işğal", fəaliyyətini isə "dəniz piratçılığı" adlandırıb: "Əgər ABŞ ordusu bölgədə mühasirəsini və piratçılığını davam etdirərsə, İranın güclü silahlı qüvvələrinin cavab verəcəyinə əmin olmalıdır".
Açıqlamada strateji boğaza nəzarətin və idarəçiliyin İranın əlində olduğu bildirilir: "Düşmənlərimizin hərəkətlərini izləməkdə qərarlıyıq. ABŞ və İsrail yenidən hücum etsələr, onlara daha ağır zərbə vuracağıq".
Bu arada, Tehran Ağ Evin İranın nüvə proqramını iyirmi il müddətinə dondurmaq tələbinə cavab verib. Yüksək vəzifəli İran diplomatı Fətəli uranı zənginləşdirmək hüququndan geri çəkilməyəcəklərini bildirib. Vaşinqton administrasiyası İranla bağlı danışıqlarda uran zənginləşdirmə proqramını tam il müddətinə dayandırmaq şərti ilə irəli sürmüşdü.
İranın Hindistandakı səfiri və yüksək vəzifəli İran diplomatı Məhəmməd Fətəli Tehranın danışıqlara açıq olduğunu, lakin "qırmızı xətlərində" güzəştə getməyəcəyini bir daha vurğulayıb. "Danışıqlar yalnız rəqiblərimiz ölkəmizin nüvə enerjisindən dinc məqsədlər üçün istifadə hüququnu tanıdıqda qənaətbəxş nəticəyə çata bilər" – deyə Fətəli sosial media hesabında bildirib.
Fətəli, İranın həmişə diplomatiyanı dəstəklədiyini, lakin Nüvə Silahlarının Yayılmaması Müqaviləsi (NPT) tərəfindən onlara verilən bütün hüquqlardan istifadə edəcəyini vurğulayıb.
İran hazırkı nüvə proqramının bir hissəsi olaraq uranı mülki istifadə məhdudiyyətlərindən çox kənara çıxararaq zənginləşdirib.
Tahir TAĞIYEV
