ABŞ-ın İranla atəşkəsin pozulması ehtimalı ilə əlaqədar olaraq Hörmüz boğazında və ətrafında İranın hərbi imkanlarını hədəf alan yeni hücum planları hazırladığı iddia edilir.
CNN-in məlumatına görə, ABŞ hərbi rəsmiləri İranın Hörmüz boğazını bağlaması ehtimalına qarşı alternativ əməliyyat ssenariləri üzərində işləyir. Planlar, xüsusən də İranın dəniz qüvvələrini və hərbi liderlərini neytrallaşdırmağı hədəfləyir.
Mənbələr Pentaqonun Hörmüz boğazı, Fars körfəzi və Oman körfəzi ətrafındakı İran ərazilərini hədəf alan müxtəlif hücumları nəzərdən keçirdiyi bildirilir. Hücumların İran İnqilab Keşikçiləri Korpusunun sürətli hücum qayıqları və mina yerləşdirmək üçün istifadə olunan gəmiləri də daxil olmaqla, İranın Hörmüz boğazında dominantlığını qorumağa kömək edən qüvvələrini hədəf alacağı qeyd edilir. ABŞ bu qüvvələrin boğazı bağlamasının və qlobal ticarətə təzyiq göstərməsinin qarşısını almağı hədəfləyir.
Əvvəlki əməliyyatlar İranın daxili ərazilərindəki hədəflərə yönəldiyi halda, ABŞ ordusu yeni planlarında strateji su yolları ətrafında daha intensiv hərbi hücumu nəzərdən keçirir. O, da qeyd olunur ki, İranın sahil müdafiə raketlərinin böyük bir hissəsi hələ də aktivdir və çoxsaylı kiçik gəmilərə malikdir. Bu isə boğazın qısa müddətdə tam açılmasını çətinləşdirir.
Digər tərəfdən, ABŞ administrasiyası İranı danışıqlara məcbur etmək üçün enerji obyektləri kimi infrastruktur hədəflərinə hücum variantını da masada saxlayır. Lakin bəzi rəsmilər bu cür addımların münaqişəni ciddi şəkildə qızışdıra biləcəyi barədə xəbərdarlıq edirlər. Alternativ variantlara danışıqlara mane olduğu düşünülən İran hərbi rəsmilərini də hədəf almaq daxildir.
ABŞ prezidenti Donald Tramp diplomatik həll yoluna üstünlük verdiyini bildirsə də, atəşkəsin daimi olmadığını və lazım gələrsə, hərbi əməliyyatların bərpa edilə biləcəyini bildirir. Tramp iddia edir ki, İran daxilindəki daxili fikir ayrılıqları da prosesi çətinləşdirir.
ABŞ diplomatik həll yolu axtarmağa davam etsə də, hərbi variantları da hazır saxlayır. Lakin, ekspertlərin fikrincə, İranın mövcud imkanlarını tamamilə aradan qaldırmadan Hörmüz boğazını təhlükəsiz şəkildə yenidən açmaq və bölgədəki gərginliyi sürətlə azaltmaq çətin görünür.
Hərbi rəsmilər tərəfindən təqdim edilən digər bir plan, ABŞ-ın müharibənin sona çatması üçün danışıqlara mane olduğuna inandığı İran hərbi liderlərini hədəf almağı nəzərdə tutur. ABŞ-ın İranın raket ehtiyatları və buraxılış meydançaları da daxil olmaqla, qalan digər hərbi imkanlarına hücumları bərpa edə biləcəyi bildirilir.
Tahir TAĞIYEV
