İran raketlərinin kölgəsində qalan Dubay, tarixinin ən böyük maliyyə sınağı ilə üzləşib. Birləşmiş Ərəb Əmirlikləri (BƏƏ) Mərkəzi Bankı dollar çatışmazlığını aradan qaldırmaq üçün Vaşinqtondan kömək istəyib.
“Wall Street Journal” qəzetinin məlumatına görə, BƏƏ İranla potensial münaqişədən irəli gələn potensial iqtisadi riskləri müzakirə etmək üçün ABŞ-ın maliyyə naziri Skott Bessent və Federal Ehtiyat Sisteminin rəsmiləri ilə gizli görüş keçirib.
BƏƏ Mərkəzi Bankının sədri Xalid Məhəmməd Balama, müharibənin neft infrastrukturuna ziyan vurması və Hörmüz boğazının bağlanması fonunda valyuta ehtiyatlarını qorumaq üçün ABŞ-la "dollar mübadiləsi xətti"nin (swap line) yaradılmasını istəyib.
Bildirilir ki, BƏƏ rəsmiləri dollar çatışmazlığı ilə üzləşəcəkləri təqdirdə neft ticarətində Çin yuanına və ya digər valyutalara keçmək məcburiyyətində qala biləcəklərini deyərək, ABŞ-ı gizli şəkildə təhdid ediblər.
FED svop xətlərini adətən yalnız qlobal bazarları sarsıdan böyük böhranlar zamanı açır. BƏƏ-nin ABŞ bazarları ilə məhdud əlaqələri nəzərə alındıqda, bu Vaşinqtonun buna gedəcəyi ehtimalı az görünür. Bildirilir ki, FED təsdiq etməsə, ABŞ Xəzinədarlıq Departamentinin ötən il Argentinaya etdiyi kimi "Valyuta Sabitləşdirmə Fondu" vasitəsilə birbaşa dəstək göstərməsi ehtimalı gündəmə gələ bilər.
İran 17 aprel atəşkəsindən əvvəl BƏƏ-yə 2800-dən çox dron və raket atıb. BƏƏ 270 milyard dollarlıq ehtiyatları ilə müqavimət göstərsə də, neft satışlarının dayandırılması və investorların qaçması ölkəni təxminən 4 milyard dollar yüksək faizli borca sürükləyib.
Bu böhran BƏƏ-ni İranla maliyyə əlaqələri qurmaqla özünü qorumaq fikrindən tamamilə uzaqlaşdıraraq ABŞ-a daha da yaxınlaşdırıb. Lakin BƏƏ bu yaxınlaşmanın əvəzi olaraq iqtisadiyyatının yenidən qurulmasında "prioritet yardım" sözü verilməsini istəyir.
Tahir TAĞIYEV
