ABŞ prezidenti Donald Tramp ailəsinin daşınmaz əmlak şirkəti ortaqları ilə birlikdə Tiflisdə yeni göydələn tikəcək. "The Wall Street Journal" qəzeti yazır ki, Trampın şirkəti yerli tərəfdaşları ilə Tbilisidə 70 mərtəbəli lüks yaşayış kompleksi – “Trump Tower Tbilisi” tikməyi planlaşdırır.
Nəşr yazır ki, Qafqazda Tramp brendi ilə yeni göydələn tikmək planlaşdırılır ki, bu da Tramp ailə şirkətinin prezidentlik müddətinin ikinci dövründə xarici biznesə yanaşmasını necə dəyişdirdiyini ortaya qoyur. Qeyd edilir ki, tikinti başa çatdıqdan sonar bu, Tiflisdəki ən böyük bina olacaq.
Bu arada, “Trump Organization” yeni layihə “Trump Tower Tbilisi” ilə bağlı rəsmi bəyanat yayıb. Bəyanatda deyilir ki, dünyanın ən böyük memarlıq şirkətlərindən biri olan “Gensler” tərəfindən layihələndirilən “Trump Tower Tbilisi” təxminən 70 mərtəbəli olacaq və Gürcüstanın ən hündür binası olacaq.
Layihədə gürcü şirkətləri “Archi Group”, “Biograpi Living” və “Blox Group” da iştirak edəcək.
“Mərkəzi Park üzərində açılan mənzərələri və prestijli yerləşməsi ilə “Trump Tower Tbilisi”, çoxfunksiyalı kompleksin mərkəzi hissəsi olacaq və lüks rezidensiyaları, premium ticarət sahələrini, dünya səviyyəli restoranları və həyat tərzinə aid seçkin xidmətləri birləşdirəcək”, – deyə bəyanatda bildirilir.
”Archi Group”un həmtəsisçisi və müşahidə şurasının sədri İlia Tsulaia deyir ki, “Trump Tower Tbilisi” layihəsi şəhərin görkəmini dəyişdirəcək və Gürcüstanın qlobal rolunu daha da gücləndirəcək.
“Biograpi Living” Gürcüstanın ən sürətlə inkişaf edən devlopment şirkətlərindən biridir. Şirkətin icraçı direktoru Vasil Pxakadzenin sözlərinə görə, “Biograpi Living” yalnız layihələr həyata keçirmir: “Biz Gürcüstanda şəhər həyatının gələcəyini yaradırıq. “Trump Tower Tbilisi” kimi layihələrlə şəhərə yeni miqyas, keyfiyyət və qlobal əhəmiyyət gətiririk”.
“Blox Group”un həmtəsisçisi Laşa Kvaçadze isə bildirir ki, “Trump Tower Tbilisi” beynəlxalq etimadın ifadəsidir və Gürcüstanın iqtisadi inkişafında mühüm mərhələni təmsil edir. Bununla yanaşı, “Finvest Georgia”nın həmtəsisçisi Laşa Meladzenin sözlərinə görə, “Trump Tower Tbilisi” Gürcüstan üçün qlobal investisiya xəritəsində mühüm mərhələdir.
Layihə həmçinin “The Sapir Organization”un ilk belə beynəlxalq kommersiya layihəsini təmsil edir. Şirkətin prezidenti və baş direktoru Aleks Sapirin rəhbərliyi ilə şirkət yeddi milyard dollardan çox dəyərində aktivləri idarə edib.
Bəyanatda qeyd olunur ki, layihənin memarlığı, dizaynı və satışları ilə bağlı əlavə təfərrüatlar yaxın aylarda məlum olacaq.
Tahir TAĞIYEV
