ABŞ-da son illərdə gizli layihələr üzərində çalışan şübhəli ölümü və ya yoxa çıxması ölkədə ciddi müzakirələrə səbəb olub. Xüsusilə kosmos və nüvə sahələrində çalışanlarla bağlı baş verənlərin təsadüf olub-olmadığı ilə bağlı şübhələr də artır.
Bu barədə açıqlama verən ABŞ prezidenti Tramp son üç ildə ölən və ya itkin düşən ən azı 10 alimlə bağlı suallara tezliklə cavab veriləcəyini bildirib: “Ümid edirəm ki, bu, təsadüfdür, amma bunun təsadüf olub-olmadığını, yəni həqiqəti növbəti həftə yarım ərzində öyrənəcəyik.... Bu, çox ciddi məsələdir... Onlardan bəziləri çox vacib insanlar idi və biz bunu tezliklə araşdıracağıq”.
Hadisələrin təsadüf olduğunu ümid etdiyini deyən Tramp, məsələnin ciddiliyini vurğulayaraq, bir neçə gün ərzində daha ətraflı məlumat əldə ediləcəyini əlavə edib.
İtkin düşənlər arasında tanınmış adlardan biri də təqaüddə olan Hərbi Hava Qüvvələri general-mayoru Uilyam Neil Makkaslanddır. Rayt-Patterson Hərbi Hava Qüvvələri Bazasında gizli proqramlarda iştirak edən Makkaslandın itkin düşməzdən əvvəl ruhi sağlamlıq problemləri yaşadığını bildirdiyi iddia edilir.
Ölən və ya itkin düşənlər arasında Los Alamos Milli Laboratoriyası ilə əlaqəli işçilər, NASA mühəndisləri və özəl sektor alimləri də var. Bu şəxslərdən bəzilərinin qətlə yetirildiyi, digərlərinin isə heç bir iz buraxmadan yoxa çıxdığı iddia edilir.
Bununla bağlı social şəbəkələrdə müxtəlif sui-qəsd nəzəriyyələri ortaya atılsa da, ortada bu olayları əlaqələndirən konkret dəlil yoxdur. Hakimiyyətin uzun müddətdir davam edən sükutu isə şübhələri bir az da artırır.
Ağ Ev məsələnin müvafiq qurumlarla müzakirə olunduğunu və zərurət yaranarsa, hərtərəfli araşdırmaya başlanacağını açıqlayıb. Yaxın günlərdə rəsmi açıqlamaların hadisələrin arxa planına aydınlıq gətirəcəyi gözlənilir.
Tahir TAĞIYEV
