ABŞ-ın İran sahilləri və Hörmüz boğazının dəniz blokadası başlayıb. ABŞ Hörmüz boğazı bölgəsinə daxil olan və çıxan bütün gəmiləri izləyəcək. İlk birbaşa qarşıdurmanın nə vaxt baş verəcəyi hələ məlum deyil.
ABŞ Prezidenti Donald Tramp deyib ki, blokadanı pozmaq istəyən İran gəmisi vurulacaq.
"İran donanması dənizin dibindədir, tamamilə məhv edilib - 158 gəmi. Vura bilmədiyimiz şey onların "sürətli hücum gəmiləri" adlandırdıqları bir neçə gəmidir; çünki biz onları böyük bir təhlükə kimi görməmişik.
Xəbərdarlıq: Əgər bu gəmilərdən hər hansı biri blokadamıza yaxınlaşarsa, onlar dənizdə qayıqlarla narkotik qaçaqmalçılarına qarşı istifadə etdiyimiz eyni məhvetmə sistemi ilə dərhal məhv ediləcəklər. Bu, sürətli və amansızca" – deyə Tramp özünün Truth Social hesabında bildirib.
“FOX News”un məlumatına görə, Corc Buşun gəmisi Aralıq dənizində hazırlıq vəziyyətindədir.
Bundan əvvəl, İnqilab Keşikçiləri səhv bir addımın Hörmüz boğazını ölümcül bir girdaba salacağını açıqlayıb. İrandan verilən açıqlamada bunun atəşkəsin pozulması hesab ediləcəyi bildirilir və Hörmüzdəki hazırlıqların daim artırıldığı qeyd olunur.
Hörmüz boğazı ilə bağlı açıqlama Çindən gəlib. Açıqlamada Hörmüzün Çinə açıq olduğu qeyd edilir və "İranla razılaşmalarımız var, daxili işlərimizə qarışmayın" deyilir.
Böyük Britaniya Dəniz Ticarət Təşkilatı (UKMTO) ABŞ-ın blokadası ilə bağlı xəbərdarlıq bildirişi yayıb. Bildirişdə qeyd edilir ki, İran limanlarını və sahil ərazilərini əhatə edən məhdudiyyətlərinin qüvvəyə minməsi barədə bildiriş alıblar.
İran Xarici İşlər Nazirliyinin sözçüsü İsmayıl Bekayi Trampın İrana qarşı "dəniz blokadası" tətbiq etməsini sərt tənqid edib. Bekayi Trampın bu addımla özünə zərər verəcəyini deyib: "Qanunsuz seçim müharibəsini qlobal iqtisadiyyata qarşı seçim qisası ilə qazanmaq mümkündürmü? Özünə kin bəsləmək üçün öz burnunu kəsmək məntiqliolarmı?"
İran Müdafiə Nazirliyinin sözçüsü Rza Talayi Nik isə ABŞ-ın Hörmüz boğazını dənizdən mühasirəyə almasının qlobal enerji böhranını dərinləşdirəcəyini deyib: "İstənilən hərbi müdaxilə qlobal enerji təhlükəsizliyi böhranını daha da artıracaq".
Trampı da hədəf alan Talayi Nik bildirib ki, o, əvvəlki uğursuz cəhdlərində olduğu kimi, Hörmüz boğazı və Ərəbistan dənizində su yollarına hərbi müdaxilə məsələsində də ABŞ-ı daha bir məğlubiyyətə aparacaq: “Trampın radikal tələbləri və Netanyahu ilə hərəkət etməsi ABŞ-ı daha dərin bir bataqlığa və yeni uğursuzluqlara sürükləyir".
İranın Hörmüz boğazı üzərindəki suverenliyini xatırladan Talayi Nik deyib: "İran Hörmüz boğazı üzərindəki tam suverenliyi çərçivəsində ABŞ və digər xarici hərbi qüvvələrin heç bir müdaxiləsinə və ya təcavüzünə icazə verməyəcək və bu cür cəhdlərə qətiyyətli və peşmanedici şəkildə cavab verəcək".
Tahir TAĞIYEV
