ABŞ və İsrail arasında 40 günlük savaşı dayandıran, 8 apreldə elan edilən atəşkəsdən sonra, davamlı sülh üçün danışıqlarının İslamabadda keçiriləcəyi gözlənilir. İsrail hökuməti danışıqlar masasına oturmasa da və müharibəni uzatmaq üçün əlindən gələni etsə də, Pakistan hökuməti tədbirlər görməkdə davam edir.
Bildirilir ki, İranın cənubundakı Hörmüzqan əyalətinin paytaxtı Bəndər Abbas üzərində Pakistan döyüş təyyarələri müşahidə edilib. Məlumata görə, Pakistan İran nümayəndə heyətini mümkün İsrail hücumlarından qorumaq üçün havada ciddi təhlükəsizlik tədbirləri görür. Pakistan Hərbi Hava Qüvvələri İran və Fars körfəzi üzərində "qoruyucu qalxan" yaradaraq qırıcı təyyarələrinə AWACS təyyarələri ilə mühafizə dəstəyi verəcək.
İsrail bundan əvvəl Dohada HƏMAS-ın yüksək vəzifəli rəsmiləri ilə Qətər nümayəndələri arasında danışıqlar zamanı hava hücumu həyata keçirərək böyük diplomatik gərginliyə səbəb olmuşdu.
Pakistan hökuməti də İranı mümkün İsrail hücumundan qorumaq üçün tədbirlər görür. İran Parlamentinin sədrinin rəhbərlik etdiyi İran nümayəndə heyətinin ABŞ-la danışıqlar aparmaq üçün bu gecə İslamabada gedəcəyi iddia edilir.
Pakistan regional ölkələrlə mübahisələrdə vasitəçi kimi çıxış etdiyindən, İslamabaddakı danışıqlardan irəli gələn hər hansı potensial problem Pakistanın vasitəçi və neytral diplomatik qarant kimi etibarlılığına da xələl gətirə bilər. Buna görə də, İslamabad İran nümayəndə heyətinin fiziki təhlükəsizliyini maksimum təmin etməyə çalışır.
İran nümayəndə heyətinə qarşı təxribat ehtimalının qarşısını almaq üçün Pakistanın J-10C və JF-17 qırıcı təyyarələri, AWACS sistemləri ilə birlikdə Tehran nümayəndə heyətini daşıyan təyyarəni İranın Hörmüzqan şəhərindən etibarən müşayiət edəcək.
Ağ Evdən verilən açıqlamaya görə, ABŞ nümayəndə heyətinə vitse-prezident Vens, Trampın xüsusi nümayəndəsi Stiv Uitkoff və Trampın kürəkəni Cared Kuşner daxil olacaq.
Tahir TAĞIYEV
