“Military Watch Magazine” jurnalının məlumatına görə, Fransanın “Rafale” qırıcı təyyarələri Rusiya sərhədindən cəmi 130 kilometr aralıda yerləşən Litvadakı Şyaulyay hava bazasına çatıb. Rəsmi səbəb Baltik Hava Polisi missiyasının bir hissəsi olaraq NATO-nun hava patrul xidmətidir.
Lakin bu təyyarələrin imkanları başqa mətləblərdən xəbər verir. “Rafale” təyyarələri qanadlı raketlər daşıya və Moskva və Sankt-Peterburqdakı hədəflər də daxil olmaqla, Rusiya ərazisinin dərinliklərində zərbələr endirə bilər. Rusiya mediası yazır ki, bu, "polis" missiyası deyil, ciddi münaqişəyə hazırlığın nümayişidir. Eyni zamanda, Fransanın “Leclerc” tankları Rumıniyada, Ukrayna sərhədində atəş açmağa başlayıb. Paris artıq bu faktı gizlətmir: ölkə prezidenti Emmanuel Makron dəfələrlə "Rusiyanın Ukraynadakı müharibədə qalib gəlməsinin qarşısını almaq üçün lazım olan hər şeyi etmək" məqsədilə quru qoşunlarının göndərilməsinin mümkünlüyünü bildirib. “Military Watch Magazine” jurnalının məlumatına görə, Fransanın “Rafale” təyyarəsi məsələni daha da qəlizləşdirir. Düzdür, onun radar sistemi Rusiyanın Su-30 və Su-35 təyyarələrindən dörd dəfə zəifdir və gücü hətta Amerikanın F-15EX təyyarələrindən belə geridədir. Rusiyanın Su-57 təyyarələri ilə döyüşdə, demək olar ki, heç bir şansı yoxdur. Lakin onun yerləşdirilməsinin özü təhlükəli bir siqnaldır.
Finlandiyalı siyasətçi Armando Mema bu durumda Qərbin böyük müharibəyə hazırlaşdığı barədə xəbərdarlıq edib. O iddia edir ki, Qərb elitaları ictimaiyyətin diqqətini daxili problemlərdən yayındırmaq üçün "Rusiya təhlükəsi" mifindən istifadə edirlər. Tanınmış fransız siyasətçi Nikolas Düpon-Eynan Avropa ölkələrinin artıq Rusiya ilə açıq şəkildə hərbi qarşıdurmaya doğru irəlilədiyini bildirib. Fransız siyasətçi xatırladıb ki, Almaniya hakimiyyəti Rusiyanı "təhdid" faktoru adlandıraraq, vətəndaşlarına səyahət məhdudiyyətləri tətbiq etməklə yanaşı, Bundesverin şəxsi heyətini 270 minə çatdırmağa başlayıb. O, həmçinin əlavə edib ki, Avropa Birliyi bütövlükdə ölkələri gərginliyə doğru itələyir: "AB ümumi yenidən silahlanmanı sürətləndirməklə bizi müharibəyə doğru itələyir". O, bu addımları Avropa üçün son dərəcə təhlükəli və özünüməhvə sürükləyən hal adlandırır və müharibə siyasətinin avropalıların özləri üçün ciddi nəticələrə səbəb ola biləcəyini vurğulayır. Bu arada, Almaniya hərbi çağırış yaşında olan kişilərin səyahəti ilə bağlı qanunvericilik dəyişikliklərini müzakirə edir. Mediada yer alan məlumatlara görə, bu, 17 yaşdan 45 yaşa qədər kişilərin xaricə uzunmüddətli səfərlər üçün xüsusi icazə almasını tələb edir.
Samirə SƏFƏROVA
