Ötən cümə axşamı, 2025-ci il mayın 29-da İslam Dövləti (İŞİD) terror qruplaşması Suriyanın yeni hakimiyyət orqanlarına qarşı ilk terror aktına görə məsuliyyəti öz üzərinə götürüb.Hücum Suriya-İsrail sərhədi yaxınlığında, Suveyda əyalətində yerləşən Tulul əs-Səfa dağlıq ərazisində baş verib. Hücumun hədəfi isə Suriya hökumət qüvvələrinə məxsus avtomobil olub. Partlayış nəticəsində 1 nəfər ölüb, 6 nəfər yaralanıb, avtomobil tamamilə sıradan çıxıb. Əsasən druzların məskunlaşdığı Tulul əl-Səfa bölgəsi İsrailin işğalı altında olan Qolan təpələri yaxınlığında yerləşdiyinə görə strateji əhəmiyyət kəsb edir. Həyata keçirilən hücum 2024-cü ilin dekabrında Bəşər Əsəd rejiminin devrilməsindən sonra hakimiyyətə gələn Suriyanın yeni hakimiyyət orqanlarının ölkədə vəziyyəti sabitləşdirməyə çalışdığı bir vaxtda baş verib. Böyük druz icmasının yaşadığı Suveyda əyaləti onilliklərlə davam edən qarşıdurmalara baxmayaraq, əvvəllər nisbətən sakit idi. Lakin yaraqlıların yenidən qruplaşmaq üçün istifadə etdiyi səhra anklavı kimi tanınan ərazidə İŞİD-in mövcudluğu gərginliyi yenidən alovlandırıb. İŞİD-in təbliğat orqanı vasitəsilə yaydığı açıqlamaya görə, avtomobil partladılması Suriyanın yeni hökumətinə qarşı kampaniya çərçivəsində planlaşdırılıb və terrorçular onu “mürtəd” adlandırıb.
Surxay Əliyev
