ABŞ prezidenti Donald Trampla telefon danışığı Putinin qələbəsi oldu. Bu gün ukraynalılar və avropalı müttəfiqlər özlərini tərk edilmiş hiss edirdilər. “Financial Times” yazır ki, ABŞ prezidenti atəşkəsə nail olmaq üçün Rusiyaya azacıq belə olsun təzyiq göstərmədi. Tramp həmçinin açıq şəkildə bildirdi ki, ABŞ sülh danışıqlarında vasitəçi rolundan imtina edir. Tramp hətta vasitəçi qismində ABŞ-ı kimin əvəz edə biləcəyini də düşünüb:-“.Vatikan - Papa XIV Leo”. "Müşahidəçilər üçün bu, üç ildən artıq davam edən genişmiqyaslı müharibədən sonra dönüş nöqtəsi oldu. İkinci səlahiyyət müddətinin ilk günündəcə Ukraynada müharibəni bitirəcəyini vəd edən Tramp Ukraynanı rus hərbi maşının ağzına atdı. Putinlə söhbətindən sonra Tramp Avropa liderlərinə etdiyi zəngdə Moskvaya əlavə təzyiq göstərmək niyyətində olmadığını açıqladı. ABŞ-ın Ukraynadakı keçmiş səfiri Stiven Pifer durumu belə dəyərləndirib:- "Trampla bu söhbət Putinin qələbəsi oldu. Tramp yaxın vaxtlarda atəşkəsin olmayacağını açıqladı, ona görə də Rusiya müharibəni davam etdirə bilər. Və əlavə sanksiyalar da olmayacaq". Ukrayna prezidenti Vladimir Zelenski söhbətdən sonra jurnalistlərə bildirib ki, memorandum təklifi ona “naməlumdur”. "Ruslar aşağı səviyyəli danışıqlar aparacaq, müxtəlif sənədlər mübadiləsi aparacaq və bu arada mübarizəni davam etdirəcək. Stimson Mərkəzindən Peter Slezkine deyib: "Hər bir tərəf Trampı digərinə qarşı qıcıqlandırmağa çalışdı və bu, öz xarakterinə görə dağıdıcı oldu. Bununla belə, digər ekspertlər qeyd edirlər ki, Tramp indi müharibənin həllindən daha çox Moskva ilə yaxınlaşmaqda maraqlıdır. "İndiki məqamda Tramp, Rusiya və ABŞ arasında münasibətlərin normallaşmasına bir məqsəd kimi baxır. Qalan hər şey də bu məqsədə tabedir", - deyə Karnegi Fondunun vitse-prezidenti Endryu Veys qeyd edib. Kreml rəhbərinin mətbuat katibi Dmitri Peskov bəyan edib ki, Rusiya ilə Ukrayna arasında sülh sazişinin bağlanması üçün heç bir müddət yoxdur. Proses ilkin mərhələdədir. Onun sözlərinə görə, hazırda Kiyev və Moskva arasında sənəd layihələrinin mübadiləsi planlaşdırılır. Hər bir tərəf öz versiyalarını hazırlayacaq, bundan sonra vahid mətn üzərində razılığa gəlmək üçün mürəkkəb danışıqlar başlamalıdır. Ukrayna prezidenti Vladimir Zelenski isə Trampla danışıqlardan sonra yüksək səslə açıqlama verib. Onun sözlərinə görə, Ukrayna Rusiyanın öz ərazisindən qoşunların çıxarılmasını nəzərdə tutan ultimatumları ilə razılaşmayacaq. ABŞ prezidenti Donald Tramp isə Ukraynanın atəşkəsə hazır olduğunu bildirib. Lakin bu istiqamətdə səyləri qiymətləndirmək üçün vaxt lazım olduğunu bildirib. Onun sözlərinə görə, bu, bir neçə həftə çəkəcək. Tramp daha sonra bildirib ki, heç bir irəliləyiş əldə olunmasa, Rusiyanın Ukraynaya qarşı müharibəsinə son qoymaq üçün danışıqlardan “uzaqlaşmağa” hazırdır.
Surxay Əliyev
