“Avropa liderləri Trampın müharibəni bitirmək üçün diplomatik səylərdən əl çəkməsindən çox qorxurlar. Bir neçə gün əvvəl Donald Trampın Ukraynada 30 günlük atəşkəs çağırışı və Rusiyanı yeni sanksiyalarla hədələməsi Avropa liderlərində ehtiyatlı da olsa nikbinliyə səbəb olmuşdu. Lakin Trampın bazar ertəsi Vladimir Putinlə telefon danışığı bu ümidləri puç etdi”-Bu fikirlər Bloomberg nəşrində yer alıb.Nəşr qeyd edir ki, iki saatlıq telefon danışığından sonra Tramp sosial şəbəkədə Ukrayna və Rusiyanın atəşkəslə bağlı “dərhal danışıqlara başlayacağını” yazıb, lakin ABŞ-ın bu işə qarışmaya biləcəyini əlavə edib. Sanksiyalardan, dəqiq qrafikdən və ya Putinə təzyiqdən isə ümumiyyətlə bəhs etməyib. Tramp söhbətdən sonra Avropa liderlərinə üz tutsa da, onun qeyri-sabitliyindən artıq çoxları məyus olub. Moskvanı sülh bağlamağa inandırmaq üçün aylarla davam edən nəticəsiz cəhdlərdən sonra Avropa paytaxtlarında ABŞ-ın sadəcə olaraq bu məsələdən əlini çəkməsi ilə bağlı narahatlıq artır. Adının açıqlanmasını istəməyən yüksək rütbəli avropalı məmurlardan biri deyib ki, “liderlər Trampın diplomatik səylərdən əl çəkməsindən qorxurlar”.
Digər bir avropalı məmur isə Trampın Moskvaya yeni sanksiyalarla təzyiq etmək fikrində olmadığını və “öz atəşkəs təklifindən geri çəkildiyini” açıq şəkildə ifadə etdiyini təsdiqləyib. Onun sözlərinə görə, nə Kiyev, nə də onun Aİ müttəfiqləri Ukrayna və Rusiya arasında birbaşa danışıqlar ideyasını bölüşmürlər. Alman Marşal Fondunun Geostrategiya Şimal proqramının direktoru Kristin Berzina isə deyib: “Bu gün biz Putinin özünə və ordusuna daha çox vaxt qazandırdığı, daha uzunmüddətli ssenariyə qayıtmışıq”. “Putin daha çox seçim əldə etdi,atəşkəs və nizamlanma isə getdikcə daha uzaq görünür”.
Surxay Əliyev
