Azər Allahverənov: “...bu hərəkətləri cəzasız qaldığı üçün bundan sui-istifadə edirdilər”
Azərbaycan vətəndaşı olmayan bəzi şəxslərin ölkəmizdə olarkən yol hərəkəti qaydalarını pozmaq, hətta idarə etdikləri nəqliyyat vasitəsilə qəza törətmək kimi hallara da yol verirlər. Elə hallar olurdu ki, yol hərəkətini pozan əcnəbi buna görə heç bir cərimə ödəmədən ölkəmizi tərk edirdi.
İndi isə belələrinə qarşı konkret sanksiya tətbiq olunub. Belə ki, əcnəbi və ya vətəndaşlığı olmayan şəxslərin ölkəmizə gəldiyi, yaxud Azərbaycanda icarəyə götürdüyü avtomobillərlə yol hərəkəti qaydalarını pozaraq cəriməni ödəmədən ölkədən çıxması hallarının qarşısı alınacaq.
Daxili İşlər Nazirliyindən mətbuata verilən məlumata görə, bu məqsədlə respublikanın bütün sərhəd məntəqələrində Baş DYP İdarəsi tərəfindən 5 dildə hazırlanmış buklet və plakat formasında olan xüsusi bildirişlərin paylanılmasına başlanıb.
Azərbaycan Respublikasının ərazisində yol hərəkəti qayda pozuntularına xüsusi texniki vasitələrin köməyi ilə nəzarət edildiyi üçün inzibati xətaya yol vermiş şəxslərin barəsində iştirakları olmadan elektron qərar çıxarılması, cərimə ödənişləri ilə bağlı qanunvericilikdə nəzərdə tutulmuş güzəşt və dəbbə pulu, habelə Azərbaycan Respublikasının Miqrasiya Məcəlləsinin 17.1.7-ci maddəsinin tələblərinə əsasən, ölkəmizin ərazisində inzibati xəta törətmiş əcnəbilərin və vətəndaşlığı olmayan şəxslərin barələrində inzibati tənbeh tədbirləri icra edilənədək onların 2020-ci il fevralın 13-dən başlayaraq Azərbaycan Respublikasından getmələri müvəqqəti məhdudlaşdırılacaq.
Buklet formalı bildirişlər sərhəd-keçid məntəqələrində nəqliyyat vasitələri ilə ölkəyə daxil olan sürücülərə paylanır, plakatlar isə həmin məntəqələrdə yaxşı oxuna bilən yerlərdən asılıb.
Həmçinin, ilin əvvəlində xarici ölkə vətəndaşlarına tətbiqi nəzərdə tutulan qanunvericiliyin tələbləri barədə məlumat çatdırılması məqsədilə Azərbaycan Respublikasının Xarici İşlər Nazirliyi vasitəsilə səfirliklərə müraciət edilib.
- “Ən azından, əcnəbilər biləcəklər ki, onlar hər hansı bir inzibati xəta törədirlərsə, buna görə cərimə sanksiyası var”
Nəqliyyat sahəsi üzrə tanınmış ekspert Azər Allahverənov bununla bağlı “Bakı-Xəbər”ə bildirdi ki, ölkəmizdə olan əcnəbilər nəqliyyat vasitələrini icarəyə götürərkən və idarə edərkən bu və ya digər formada inzibati xətalar törədirlər. “Amma burada bir nüans da var. Həmin əcnəbilər öz avtomobili ilə ölkəmizə daxil olur və burada olduğu müddətdə inzibati xəta törədir. Məntiqlədir ki, o inzibati xəta Dövlət Yol Polisi tərəfindən qeydə alınırsa, bununla bağlı sanksiyaların tətbiq edilməsi üçün qərar çıxarılır. Ancaq o qərardan irəli gələrək həmin şəxsin cərimə ödəməsi prosesi təmin edilməlidir. Təmin edilmədiyi halda, Miqrasiya Məcəlləsinin 17.1.7-ci maddəsində tələblər var. Ölkəmizin ərazisində inzibati xəta törətmiş əcnəbilərin və ya vətəndaşlığı olmayan şəxslərin barəsində inzibati tənbeh tədbirləri icra edilənədək onların 2020-ci il fevralın 13-dən başlayaraq Azərbaycan Respublikasından getmələri müvəqqəti məhdudlaşdırılacaq. Yəni, faktiki olaraq, onlar cərimə ödəmədikləri təqdirdə ölkə ərazisindən çıxmaları məhdudlaşdırılır. Məhdudlaşdırma barədə qərarın verilməsi, onlara sanksiyaların tətbiq edilməsi ilə bağlı qurumlar arasında danışıqlar aparılır, işlər görülür. Bu mexanizmin necə işləyəcəyi ilə bağlı müzakirələr gedir. Hələ ki, mən bu haqda tam geniş şərh verə bilmirəm. Faktiki olaraq, ölkə ərazisində olan əcnəbilər nəqliyyat vasitələrini idarə edərkən inzibatı xətalara yol verirlər və onların bu hərəkətləri cəzasız qaldığı üçün əcnəbilər bundan sui-istifadə edirlər. Nəticə etibarilə də onlar törətdikləri xətaya görə heç bir məsuliyyət hiss etmirlər. Sanksiya mexanizmi tam olaraq işlək vəziyyətə salındıqdan sonra bu prosesin qarşısı alınacaq. Hesab edirəm ki, bununla bağlı müsbət nəticələr əldə oluna bilər. Ən azından, əcnəbilər biləcəklər ki, onlar hər hansı bir inzibati xəta törədirlərsə, buna görə cərimə sanksiyası var və ödəmədikləri təqdirdə ölkə ərazisini tərk edə bilməyəcəklər”.
Bundan beynəlxalq təcrübədə geniş istifadə edildiyini deyən A.Allahverənov hesab edir ki, qonşu Gürcüstan Respublikasında da artıq bu, tətbiq edilir. O ümid edir ki, Azərbaycanda bu mexanizm işlək vəziyyətə gətirildikdən sonra əcnəbilərin iştirakı ilə törədilən inzibati xətaların miqyası azalacaq.
İradə SARIYEVA
