“İgid ölər, adı qalar” deyimi əsrlərdir xalqımızın cəsur, qorxmaz, qəhrəman oğullarına əbədi minnətdarlığı kimi yaşayır. Hər dövrün öz qəhrəmanları var və bu qəhrəmanlar xalqımızın yaddaşında yaşayır, adları nəsildən-nəsilə ötürülərək yaşadılır.
İyirminci yüzilliyin sonlarında ermənilərin torpaqlarımıza təcavüzü nəticəsində ana yurdunu düşməndən xilas etmək, Azərbaycanın ərazi bütövlüyünü qorumaq istəyilə yüzlərlə vətən oğlu silaha sarıldı, son damla qanına qədər döyüşdü, şəhidlik mərtəbəsinə ucaldı, qazi adı qazandı.
Qarabağ savaşında misilsiz qəhrəmanlıq göstərən, şəhidlik və qazilik zirvəsinə yüksələn Azərbaycanın milli qəhrəmanlarının adı tariximizin səhifələrinə yazıldı. Bu gün Azərbaycanın ərazi bütövlüyü uğrunda şəhid olan, canını fəda edən hər bir vətən övladı xalqımız üçün misli olmayan bir dəyərdir. Xalqımızın qəhrəman oğullarını uşaqlara və gənc nəslə tanıtmaq, onların mübarizə yolunu təlqin etmək, şəhidlik irsini təbliğ etmək borcumuzdur. Qəhrəmanını tanımayan gəncliyin vətənpərvərlik tərbiyəsi tam olaraq formalaşa bilməz. Gənclərimizin öz qəhrəmanlarını tanıması ən ümdə məsələlərdən biridir. Qəhrəmanlıq özü bir məktəbdir ki, ondan örnək götürənlər vətənin sabahını qorumaq əzminə yiyələnirlər.
Uzun illərdir şəhidlərimizin xatirələrinin əbədiləşdirilməsi istiqamətində dövlət səviyyəsində böyük işlər görülür, onların adları küçələrə, meydanlara, təhsil ocaqlarına, ayrı-ayrı müəssisələrə verilir, heykəlləri, büstləri ucaldılır, yaşadıqları evlərə xatirə löhvələri vurulur. Əlbəttə, bu amil onların qəhrəmanlıq, şəhidlik irsinin təbliğində mühüm rol oynayır.
Şəhidlərimizin, “Milli Qəhrəman” fəxri adı, “Azərbaycan Bayrağı” ordeni və digər mükafatlarla təltif edilmiş qəhrəmanlarımızın adlarının vaxtilə oxuduqları orta məktəblərə verilməsi artıq bir ənənə halını alıb. Bu müsbət ənənə ölkəmizin hər yerində mövcuddur.
Bu gün daha bir maraqlı ideya irəli sürülüb. Artıq qəhrəmanların adlarının əbədiləşdirilməsinin digər bir variantı da meydana çıxıb. Milli qəhrəmanların adlarının orta məktəb siniflərinə verilməsi ideyası. Orta məktəb siniflərinə milli qəhrəmanların adlarının verilməsi sözsüz ki, gənc nəslin vətənpərvərlik tərbiyəsinin inkişafında mühüm rol oynayacaq. Böyük həyat, vətənpərvərlik məktəbi olan hər bir Milli Qəhrəman xalqımızın, dövlətimizin əbədiyaşar mənəvi sərvətidir.
Qiymət Məhərrəmli: “Milli qəhrəmanların adlarını daşıyacaq nümunəvi siniflər yaradılarsa, bu, şagirdlərin vətənpərvərlik hisslərinin formalaşmasında, milli mənlik şüurunun yetişməsində misilsiz rol oynayacaq”
Azərbaycan Milli Elmlər Akademiyasının (AMEA) Folklor İnstitutunun əməkdaşı, filologiya üzrə fəlsəfə doktoru Qiymət Məhərrəmlinin fikrincə, milli qəhrəmanların adlarının əbədiləşdirilməsi, onların gənc nəslə tanıdılması üçün məktəblərdə nümunəvi siniflər yaradılmalı və həmin siniflərə milli qəhrəmanların adları verilməlidir: “Milli qəhrəmanlarımızı kiçikdən böyüyə kimi hamı tanımalı və onların döyüş yolunu, qəhrəmanlıq salnaməsini bilməli, təbliğ etməlidir. Uşaqların, yeniyetmə və gənclərin milli qəhrəmanları yaxından tanıması çox vacibdir. Bilirik ki, bir çox məktəbə milli qəhrəmanların adları verilib. Amma bəzən o milli qəhrəmanlar lazımi səviyyədə təbliğ olunmur. Bu da bəzi orta məktəb rəhbərlərinin, xüsusən də tarix müəllimlərinin məktəblərdə ideoloji işi düzgün qura bilməməsinin nəticəsidir. Bilirsiniz, vətənpərvərlik yalnız beş-on dənə bu mövzuda şeir əzbərlətməklə təbliğ olunmur, o xüsusi şəkildə təbliğ olunmalıdır. Bəli, bu gün orta məktəblərdə xüsusi nümunəvi siniflər yaradılmalıdır və həmin siniflər milli qəhrəmanların adını daşımalıdır. Bu çox müsbət bir iş olardı. Düşünürəm ki, Təhsil Nazirliyi və əlaqədar qurumlar bu istiqamətdə addımlar atacaqlar. Milli qəhrəmanların adlarını daşıyacaq nümunəvi siniflər yaradılarsa, bu, şagirdlərin vətənpərvərlik hisslərinin formalaşmasında, milli mənlik şüurunun yetişməsində misilsiz rol oynayacaq. Bu həm də milli qəhrəmanlarımızın keçdiyi döyüş yolunun və şanlı şəhidlik irsinin təbliğində böyük effektə səbəb olacaq”.
Q.Məhərrəmli hesab edir ki, milli qəhrəmanların adını daşıyan siniflərdə təhsil alan şagirdlər bütün güclərini səfərbər edib qəhrəmanın adına layiq olmağa çalışacaqlar. O, həmçinin, deyir ki, bu işdə dövlət qurumları ilə yanaşı, ictimai təşkilatlar, valideyn icmaları da məktəblərə dəstək olmalıdırlar.
Faiq Ələkbərli: “Siniflərə milli qəhrəmanların adlarının verilməsi...”
AMEA-nın Fəlsəfə İnstitutunun aparıcı elmi işçisi, tarix üzrə fəlsəfə doktoru Faiq Ələkbərli isə “Bakı-Xəbər”ə açıqlamasında bildirdi ki, milli qəhrəmanların adları daha çox məktəblərə verilməlidir, nəinki siniflərə: “Milli qəhrəmanların adları daha çox məktəblərin özlərinə verilməlidir. Onların qəhrəmanlığı, şücaəti daha çox təbliğ olunmalıdır. Hesab edirəm ki, siniflərə milli qəhrəmanların adlarının verilməsi elə də münasib deyil, onların adları məktəblərdə əbədiləşdirilməlidir. Siniflərə isə “İgidliyə görə” medalı, eləcə də digər ad, orden və medalla təltif edilənlərin adları verilsə, daha məqsədəuyğun olar”.
İradə SARIYEVA
