Bir neçə gündür Elmi-Tədqiqat Ağciyər Xəstəlikləri İnstitutunda qeydə alınan ölüm faktları cəmiyyətdə ciddi narahatlığa səbəb olub. Xəstəxana barədə səsləndirilən bir sıra faktlar öz əsasını tapmasa da, bir neçə gün öncə xəstəxananın baş həkimi İman Rzayevin Elmi-Tədqiqat Ağciyər Xəstəlikləri İnstitutunda həkim-reanimatoloq olmaması barədə açıqlaması isə ciddi ajiotaj yaradıb.
Qeyd etdiyimiz kimi, son bir ayda adıçəkilən xəstəxanada ard-arda ölüm halları baş verir. Ötən gün Elmi-Tədqiqat Ağciyər Xəstəlikləri İnstitutunda daha 2 xəstə ölüb.
Bildirək ki, son 4 ayda ETAXİ-də 11 nəfər ölüb. Burada qeydə alınan ölüm faktlarını TƏBİB də təsdiqləyir.
Elmi-Tədqiqat Ağciyər Xəstəlikləri İnstitutu - Həqiqət Qədirova: “Son bir neçə gündə xəstəxanada ölüm faktları qeydə alınıb”
ETAXİ-nin direktoru Həqiqət Qədirova bildirdi ki, son bir neçə gündə xəstəxanada ölüm faktları qeydə alınıb: “Ölənlərdən biri - 1959-cü il təvəllüdlü şəxs xəstəxanaya yanvarın 31-də yerləşdirilib. Həmin vaxta qədər bir sıra xəstəxanalarda müayinə və müalicə edilən xəstəyə ağır diaqnozlar qoyulub. Göstərilən səylərə baxmayaraq, ağır vəziyyətdə reanimasiya şöbəsinə köçürülən xəstə dünyasını dəyişib. 1944-cü il təvəllüdlü digər xəstə isə instituta fevralın 5-də ağır vəziyyətdə, soltərəfli piopnevmotoraks, sepsiki vəziyyət, xroniki böyrək çatışmazlığı diaqnozu ilə daxil olub. O, döş qəfəsi cərrahiyyəsi şöbəsinə yerləşdirilib”.
Adil Qeybulla: “…onların koronavirusdan dünyasını dəyişib-dəyişmədiyi aydınlaşdırılmalıdır”
Son günlər ETAXİ-də qeydə alınan ölüm halları nə səbəbdən baş verir? Məsələ ilə bağlı professor, həkim-ekspert Adil Qeybullanın fikirlərini öyrəndik. O, “Bakı-Xəbər”ə açıqlamasında qeyd etdi ki, hər il mövsümi soyuqdəymə xəstəlikləri zamanı müəyyən kateqoriyalı insanlar dünyasını dəyişir: “Ağciyər Xəstəlikləri İnstitutuna, adətən, sətəlcəmin ağır formasında olan xəstələr yerləşdirilir. Belə bir fikir var ki, xəstəxanada qeydə alınan ölüm faktlarına səbəb koronavirusdur. Nəzərə almaq lazımdır ki, hər il mövsümi soyuqdəymə xəstəlikləri zamanı müəyyən kateqoriyalı insanlar vəfat edirlər. Bu ilin xəstəliyi isə koronavirusdur. Koronavirus təhlükəli xəstəlikdir. Artıq bu məsələyə Ümumdünya Səhiyyə Təşkilatı qarışıb. Bu, onun öhdəsində olan məsələdir, bütün dünya onun tövsiyələri əsasında hərəkət etməlidir. Ölkədə karantin tədbirlər var. Əhali arasında maarifləndirmə işlərinə geniş yer verilməlidir. Bütün bunlar ondan ötrüdür ki, insanlar xəstələnəndə düz hərəkət etsinlər, xəstəliyi ayaq üstə keçirməsinlər. Xəstəliyi ağırlaşdırmaq olmaz. Əslində, görünən reallıq odur ki, insanlar xəstəliyə önəm vermirlər. Müalicə olunan xəstəlik getdikcə ağırlaşır, immun sistemi zəifləyir, nəticədə xəstə həyatını itirir”.
A.Qeybullanın sözlərinə görə, bu günlərdə ETAXİ-də ölənlərdən nümunələr götürülməli və analiz edilməlidir: "Ölənlərin burun boşluğundan, nəfəs yollarından yaxmalar götürülməlidir. Onların koronavirusdan dünyasını dəyişib-dəyişmədiyi aydınlaşdırılmalıdr. Təəssüf ki, biz bu araşdırmaların şahidi olmuruq”.
Günel CƏLİLOVA
