Paytaxt apteklərində satılan dərman preparatlarının vahid qiymət tarifinin olmaması, dərmanların bir neçə qat baha qiymətə satılması faktdır. Elə dərman vasitələri var ki, onlara hər aptek öz istədiyi qiyməti qoyaraq müştəriyə satır. Bu problem azmış kimi indi də apteklərin bir çoxunda dövlət reyestrindən keçməyən dərman preparatları satılır. Özü də od bahasına. Əlbəttə, bu dərmanların ölkəmizə daxil olmasına, qeydiyyata alınmadan satışa çıxarılmasına şərait yaradan şəxslər var.
Bu gün paytaxt apteklərində satılan bəzi dərmanların, o cümlədən də “Ventolin Nebules” adlı dərmanın reyestrdən keçmədiyini Səhiyyə Nazirliyinin müvafiq qurumu da təsdiqləyir. Nazirliyin Analitik Ekspertiza Mərkəzinin mətbuat xidmətinin rəhbəri Esmira Əkbərova bildirib ki, “Ventolin Nebules” adlı dərman Dövlət Reyestrində qeydiyyatdan keçməyib.
Tibb üzrə tanınmış mütəxəssis, professor Adil Qeybulla baki-xeber.com-a bildirdi ki, bu kimi halın mövcud olması dərman təhlükəsizliyinə ziddir. A.Qeybulla hesab edir ki, Dövlər Reyestrindən keçməyən dərmanların apteklərə yol açmasında məsuliyyət daşıyan şəxslər var: ”Heç şübhəsiz ki, apteklərdə müşahidə edilən bu hal özbaşınalıqdır. O dərmanları ölkəmizə kimlər gətirib? Burada ilk növbədə bu dərmanları ölkəyə gətirən şəxslər məsuliyyət daşıyırlar. Mən əslində, ölkəmizə gətirilərək Dövlət Reyestrinə salınan, qeydiyyata alınan dərmanlarla bağlı həyata keçirilən proseslərin şəffaflığına inanmıram. Dərmanların qeydiyyat prosesinin özü şübhəlidir. Amma heç olmasa qeydiyyat bir məsuliyyətdir. Dərman maddələrinin ayrıca dövlət reyestri olmalıdır, o dərman vasitələri ictimaiyyətə açıq olmalıdır. Bizdə dərmanlar hansısa bir innovasiya mərkəzində qeydiyyatdan keçir, amma dərmanların tərkibi ictimailəşdirilmir. İstənilən vətəndaş üçün açıq olmalıdır ki, Azərbaycanda satışına icazə verilən dərman preparatları hansılardır, o laboratoriyadan nə zaman qeydiyyatdan keçirilib, ona nə vaxt lisenziya verilib. Vətəndaş belə bir siyahını heç bir yerdə görə bilmir. Ona görə də, belə bir vəziyyət yaranır. Dərman təhlükəsizliyi milli təhlükəsizlik konsepsiyasının tərkib hissəsidir. Ölkəmizdə qeydiyyatda olmayan dərman preparatlarının satılması çox ciddi məsuliyyət yaradır”.
A.Qeybulla həmçinin vurğuladı ki, bu həm də milli genefonumuzu ciddi təhlükə altına qoyan bir amildir: ”Dövlət Reyestrindən keçməyən dərmanları ölkəyə gətirən firmaların hansı yollarla aptek şəbəkəsinə daxil olması ciddi şəkildə araşdırılmalıdır. Bu halın baş verməsi onu göstərir ki, müəyyən korporativ maraqlar qanunları, milli maraqları üstələyir. Apteklərin heç bir ixtiyarı yoxdur ki, özbaşına dərman satsınlar. Dövlət reyestrindən keçməyən, Azərbaycanda istifadəsinə rəsmən icazə verilməyən dərman preparatları apteklərdə satılırsa bu cinayət məsuliyyəti yaradır”.
İradə SARIYEVA
