"Bakıda təxmini olaraq 25 mindən çox qeyri-qanuni fəaliyyət göstərən taksi var. Bizim hesablamalarımıza görə, paytaxt üçün 8500 ədəd taksi fəaliyyəti lazımdır". Bunu Bakı Nəqliyyat Agentliyinin (BNA) İdarə Heyətinin sədri Vüsal Kərimli deyib.
BNA sədri əlavə edib ki, ilin ilk rübü iqtisadi baxımdan əsaslandırılmış tariflər hesablanacaq və aidiyyəti qurumlara göndəriləcək. Bununla bağlı işlər ilk 6 ay ərzində tamamlanacaq.
Maraqlıdır, taksi sayının azaldılması və yeni tariflər taksi qiymətlərinə necə təsir edəcək? Həmçinin, 25 min taksidən yalnız 8500 ədəd taksinin fəaliyyət göstərməsi yerdə qalan taksi sürücülərinin işsiz qalmasına səbəb ola bilərmi?
"...səbəb ictimai nəqliyyatın düzgün qurulmaması, avtobusların sayının kifayət qədər olmamasıdır"
Məsələ ilə bağlı fikir bildirən sosial sahə üzrə ekspert İlqar Hüseynli bildirdi ki, bu gün taksi fəaliyyəti ilə məşğul olanların sayı çoxdur. Ancaq bu o demək deyil ki, onların sayı azaldılmalıdır. Çünki taksidə çalışanların əksəriyyəti işi olmayan şəxslərdir. Taksi sayının azaldılması çoxlu sayda sürücünün işsiz qalmasına səbəb olacaq: "Onlar özlərinə kredit yolu ilə avtomobil alıb taksi kimi çalışırlar. Onu da deyim ki, taksi fəaliyyəti ilə qanunsuz məşğul olunması dünyanın bir çox ölkəsində var. Məsələn, Türkiyəni misal çəksək, rəsmi olaraq, İstanbul şəhərində 30 min taksi var. Bu sayın yarıdan çoxu qanunsuz fəaliyyət göstərən taksilərdir. Hətta İstanbulun Avropaya düşən hissəsində eyni nömrə ilə iki taksi fəaliyyət göstərir. Orada taksi böyük bir şəbəkənin əlində cəmləşib, dövlət belə ona müdaxilə edə bilmir. Onu da nəzərə almaq lazımdır ki, heç kim kefindən taksi sürmür. Nadir hallarda ola bilər ki, taksi sürücüsü bu işə məhz peşə kimi baxsın. Əksər hallarda iş tapa bilmirlər və bu işə əl atırlar. Buna görə bizim də onların qarşılarını kəsməyimiz bir o qədər düzgün olmaz. Bu qədər taksinin ərsəyə gəlməsinə səbəb ictimai nəqliyyatın düzgün qurulmaması, avtobusların sayının kifayət qədər olmamasıdır".
Ekspert taksi xidmətlərinin vahid tarif ilə fəaliyyət göstərməsinə gəlincə, bildirdi ki, bu, beynəlxalq təcrübəyə əsaslanır: "Gecə və gündüz tariflərini Azərbaycanda da tətbiq etmək lazımdır. Bu tariflər bizim üçün standart qiymət olacaq. Amma bunu necə müəyyənləşdirəcəyik? Taksometr varmı? Nəzərə almaq lazımdır ki, bütün taksilərdə taksometr yoxdur. Maraqlıdır, BNA bütün taksiləri taksometrlə təmin edə biləcəkmi? Taksilərdə vahid tarifin tətbiq olunmasının tərəfdarıyam".
Günel CƏLİLOVA
