Ölkəmizdə aztəminatlı ailələrin sosial müdafiəsinin gücləndirilməsi üçün dövlət tərəfindən həyata keçirilən proqramların hər biri böyük əhəmiyyətə malikdir. Lakin sosial yardımların, eləcə də kasıblar üçün nəzərdə tutulan iş yerlərinin pulunun bəzi məmurlar tərəfindən mənimsənilməsi faktı diqqəti çəkir. Azərbaycan Respublikasının Prezidenti İlham Əliyev keçirdiyi əvvəlki müşavirələrdə də, son müşavirədə də bu məsələyə toxunub.
Dövlət başçısı “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda bir sıra ciddi məsələlərdən danışıb: “Sosial layihələr arasında ödənişli ictimai iş yerlərinin yaradılması da var. Bu da mənim təşəbbüsümlə irəli sürülmüş məsələdir, o vaxt ki, ölkəmizdə işsizlik bir qədər artmışdı. Onun da səbəbi o idi ki, neftin qiyməti 4 dəfə aşağı düşdü, biz məcbur olub investisiya xərclərimizi ixtisar etdik... Mən giriş sözümdə dedim, valyuta ehtiyatlarımızı hətta bizim üçün ən ağır illərdə artıra bilmişik. Amma investisiya xərclərini azaltdıq və beləliklə, bu layihələrdə iştirakı nəzərdə tutulan insanlar işsiz qaldılar. Ona görə mənim göstərişimlə ödənişli ictimai iş yerləri yaradıldı. Ancaq əfsuslar olsun ki, bu sahədə bölgələrdə pozuntulara yol verildi və bu pozuntulara yol verən şəxslər cəzalandırıldı. Əgər bu biabırçı faktlar təkrarlanarsa, heç kim cəzadan yaxa qurtara bilməyəcək. Çünki kasıb təbəqə üçün nəzərdə tutulan iş yerlərinin pulunu mənimsəmək böyük vicdansızlıqdır. Ona görə çox ciddi nəzarət var. Əminəm ki, belə hallar təkrarlanmayacaq. Amma yenə də ciddi nəzarət olmalıdır. Əmək və Əhalinin Sosial Müdafiəsi Nazirliyinə tapşırıq verilib ki, bütün iş yerləri qeydiyyatdan keçsin və nəzarət güclü olsun. Baxmayaraq ki, işsizliklə bağlı vəziyyət ötən il yenə də böyük dərəcədə yaxşılaşdı, amma əhali artır. Biz bunu nəzərə almalıyıq. Ona görə bu il də dövlət xətti ilə təxminən 40 minə yaxın iş yeri yaradılacaq”.
“...vəhşiliyin bir nümunəsidir”
Siyasi şərhçi Azər Həsrət “Bakı-Xəbər”ə bildirdi ki, bir sıra məmurların əhalinin kasıb təbəqəsinə zülm etməsi Prezidentin diqqətindən yayınmayıb və xalqın malına göz dikən məmurlar cəzalandırılıblar: ”Əlbəttə ki, cənab Prezident bu neqativ hərəkətləri edən məmurların əməllərini tənqid etməklə onların əməllərinə qiymət verdi və bildirdi ki, kasıb təbəqə üçün nəzərdə tutulan iş yerlərinin pulunu mənimsəmək böyük vicdansızlıqdır. Bu həm vicdansızlıqdır, həm də böyük qansızlıqdır. Çünki dövlət elə bir kateqoriyadan olan insanlar üçün bu vəsaiti ayırır ki, həmin insanlar, ən azından, ac qalmasınlar, öz sosial problemlərini minimal səviyyədə də olsa ödəsinlər, həll etsinlər. Amma bir çox vicdansız məmur xüsusən də rayon yerlərində o pulları vucdansızcasına mənimsəyir. Ağstafa rayonunun keçmiş icra başçısının məhz belə vicdansızlığa, kasıb təbəqə üçün ayrılan iş yerlərinə görə verilən pulu mənimsədiyinə görə həbs edilməsi başqalarına da dərs olmalıdır. O, dövlət tərəfindən vətəndaşlara ayrılan vəsaiti, vətəndaşlara çatacaq maaş kartlarını mənimsədiyi üçün həbs edilib. Bu kimi halların başqa rayonlarda da baş verdiyi haqqında məlumatlar eşidirik. Bir çox məmurun, xüsusən də rayon icra başçılarının, eləcə də onların ətrafındakı şəxslərin, müxtəlif dövlət qurumlarının yerli strukturlarının rəhbərlərinin kasıb təbəqəyə ayrılan vəsaiti mənimsəməsi vəhşiliyin bir nümunəsidir. Bu qeyri-insani, qeyri-humanist bir haldır. Çünki dövlət tərəfindən sosial cəhətdən zəif insanlara ayrılan o vəsait gedib ünvanına çatmalıdır, amma bəzi məmurlar bu vəsaiti vicdansızcasına mənimsəyirlər. Kasıb insanlar üçün iş yerlərinin yaradılması, onlara ayrılan maliyyə vəsaiti Prezidentin vətəndaşa bəslədiyi qayğının təzahürüdür. Amma yerlərdəki məmurlar vicdansızlıq edərək kasıb təbəqə üçün nəzərdə tutulan vəsaiti talayırlar. Ona görə də cənab Prezident bu səviyyədə həmin məsələni qaldırdı. Düşünürəm ki, indən sonra bu kimi əməllərlə məşğul olan adamlara qarşı ciddi ölçü götürülməli və onlar başqaları üçün də görk olacaq şəkildə cəzalandırılmalıdırlar”.
A.Həsrət hesab edir ki, belələrini xalq içində gözdən salmaq və ictimai qınağa məruz qoymaq lazımdır. “Bir dövlət məmuru nə qədər vicdansız, qeyri-humanist olmalıdır ki, kasıb təbəqə üçün ayrılan vəsaiti mənimsəsin. Cənab Prezident dövlətin kasıb təbəqəyə ayırdığı vəsaiti qansızcasına mənimsəyən məmurların kimliyini bilir və onların əməllərini bu şəkildə ifşa edir. Məmurlar bundan nəticə çıxarmalıdırlar ki, sərt cəzadan yaxa qurtara bilsinlər” - deyə A.Həsrət vurğuladı.
İradə SARIYEVA
