Çində ötən ilin dekabrından peyda olan və sürətlə yayılan ölümcül koronavirus səbəbindən dünyada tibbi maskaların çatışmazlığı yaranıb. Artıq “Amazon” və “Alibaba” onlayn platformalarında maska satan bir çox mağazada malların tükəndiyi deyilir.
Çin, Honq Konq və Sinqapurda əhali maska ala bilmək üçün apteklərin qarşısında növbəyə düzülür. Hətta ABŞ-ın San-Fransisko, Orlando kimi bəzi şəhərlərinin sakinləri yerli aptek və dükanlardan maskaların yoxa çıxdığını deyirlər.
Koronavirus təhlükəsi ilə bağlı Azərbaycanda da cavabdeh dövlət orqanları gücləndirilmiş iş rejiminə keçiblər. Prezident İlham Əliyevin tapşırığı ilə Baş nazir Əli Əsədov aidiyyəti dövlət strukturları rəhbərlərinin iştirakı ilə müşavirə keçirib, epidemiyaya qarşı qabaqlayıcı tədbirlərin görülməsi haqda qərar qəbul edilib.
Ölkəmizdə də tibbi maskalara və hər hansı bir virusdan qorunmaq üçün spirtə olan tələbatın artıb-artmadığını öyrənmək məqsədilə Bakının bəzi apteklərində müşahidə aparıb, satıcılarla söhbətləşdik. Məlum oldu ki, xüsusilə son bir həftədə paytaxt apteklərində qoruyucu maska satışı bir neçə dəfə artıb. Uşaqları məktəbə gedən valideynlər də bu yolla övladlarını virusdan qorumağa çalışırlar.
Satıcılar bildirirlər ki, aptekə girən müştərilərin xeyli hissəsi maska soruşur: “Hətta rəngi də fərq etmir, ağ, qara, yaşıl, nə rəng olsa alırlar. Amma tələbata baxmayaraq, qiymətdə dəyişiklik yoxdur, tibbi maskanın biri 10 qəpiyə satılır.
Qeyd etdiyim kimi, apteklərə tibbi spirt və maska limitlə verilir. Tibbi maska və spirtin əvvəlki qiyməti ilə indikində heç bir fərq yoxdur. Yenə də tibbi maska 10 qəpik, 100 ml həcmli şüşə qabdakı tibbi spirt isə 50 qəpikdir. Amma günlük tələbat xeyli artıb. Hətta spirti bizə limitlə verirlər. Yəni gündə 2 paketdən və ya 100 ədəddən artıq spirt gətirmək olmur”.
Satıcılar onu da bildirdilər ki, son zamanlar məktəblərdə şagirdlərdən spirt və maska tələb olunur. Aptekə girənlərin əksəriyyəti maska və tibbi spirt aldığı üçün hazırda adıçəkilən məhsulların qıtlığı yaşanır.
Günel CƏLİLOVA
