Azərbaycanın orta ümumtəhsil məktəblərində təhsil alan şagirdlərin 2020-2021-ci tədris ilində tamamilə yeni dizaynda, yeni rəng çeşidində məktəbli formasından istifadə edəcəyi artıq xeyli müddətdir rəsmi şəkildə açıqlanıb. Şagirdlərimizin yeni tədris ilində geyəcəyi 4 modeldə təqdim ediləcək formaların hazırlanması işinin Təhsil Nazirliyi tərəfindən Bakı Tikiş Evinə həvalə edildiyi də məlumdur. Üzümüzə gələn aylardan başlayaraq Bakı Tikiş Evi məktəbli formalarının hazırlanmasına start verəcək.
Bu arada bir çox tikiş fabriki, o cümlədən, Bakı Tekstil Fabriki Bakı Tikiş Evini məktəbli forması bazarında monopoliya yaratmaqda ittiham edirlər. Bakı Tekstil Fabrikinin direktoru Səkinə Babayeva ötən həftə mətbuat konfransı keçirərək Bakı Tikiş Evinə qarşı bir sıra ittihamlar, o cümlədən, sahibi olduğu fabrikə aid olan 4 məktəbli geyim modelinin Bakı Tikiş Evi tərəfindən plagiatlığa məruz qaldığını açıqladı. 10 ildən artıq bir müddətdə məktəbli forması sahəsində böyük işlər gördüklərini deyən S.Babayevanın sözlərinə görə, Bakı Tikiş Evinin tikdiyi məktəbli formaları tamamilə keyfiyyətsizdir.
“Bakı Tikiş Evi heç bir halda monopoliya yaratmır”
Bakı Tekstil Fabrikinin rəhbərinin Bakı Tikiş Evinə qarşı irəli sürdüyü ittihamlara Bakı Tikiş Evinin satış rəhbəri Etibar Əzimov çox sərt reaksiya verdi. E.Əzimov qeyd etdi ki, heç bir fabrikin təmsil etdiyi tikiş evini nə plagiatlıqda, nə monopoliya yaratmaqda, nə də keyfiyyətsiz məhsullar istehsal etməkdə ittiham edə bilməz. “Bakı Tekstil Fabrikinin, yaxud hansısa digər bir fabrikin hansı formasını mənimsəyə bilərik ki? Nəyləri var ki, nəylərini də mənimsəyək? Bunlar hamısı boş-boş sözlərdir. Ona görə də bu məsələyə geniş şərh vermək niyyətində deyiləm. Bakı Tikiş Evi 10 ildir 4 modeldə məktəbli forması tikir və həmin modellər də bizə məxsusdur, sertifikatımız, müəlliflik hüquqlarımız, dövlət tərəfindən təsdiqlənmiş sənədlərimiz var. Yəni Bakı Tikiş Evi (BTE) artıq 10 ildir vahid məktəbli formasının istehsalını və satışını həyata keçirir. BTE loqosu ilə məktəbli geyimləri dörd modeldə hazırlanır. Gigiyenik və uyğunluq sertifikatı olan formaların parçası Türkiyədən gətirilir və bu geyimlər uşaqların sağlamlığına heç bir əks təsir göstərmir. Məktəbli formalarının keyfiyyətinə bir il zəmanət verilir. I-VI, VII-XI sinif şagirdləri üçün kostyumlar tikirik. Ümumilikdə isə BTE-nin 9 filialı var. Bizim tikdiyimiz məktəbli formaları Təhsil Nazirliyi tərəfindən 50 modelin içindən seçilib. Bizim istifadə etdiyimiz parçalar Avropa laboratoriyalarında sınaqdan çıxıb və sertifikat alıblar. Təhsil Nazirliyi də istəyir ki, sifarişi sertifikatı olan yerə versin. Gələcəkdə hansı modellər olacaq, onları müəyyənləşdiririk və hazırlayıb təqdim edəcəyik. Bakı Tikiş Evi heç bir halda monopoliya yaratmır. Bizim istehsal etdiyimiz cəmi 4 model üzrə məktəbli geyimləridir. Biz monopoliya yaradırıqsa, onda digər çeşiddə olan məktəbli formaları necə meydana çıxır? Bizim modellərimizdən də fərqli modellər var, şagirdlər istifadə edirlər. Bakı Tikiş Evinin, ümumiyyətlə, rayonlarla heç bir əlaqəsi yoxdur. Monopoliya yaratmışıqsa, onda rayon məktəbliləri geyimləri necə əldə edirlər? Onların geyimləri başqa fabriklərə məxsusdur. Biz ötən il 20 min ədəd məktəbli forması tikmişik, onun da 10 min ədədini Təhsil Nazirliyi alıb internat məktəblərinə və ehtiyacı olan şagirdlərə payladı. Yeni tədris ilində 3 forma təsdiqlənəcək. Onun biri Bakı Tikiş Evinə aid olacaq, bəs o birilər hansı qurumun olacaq? Əlbəttə ki, başqa məktəbli formaları tikən fabriklər də iş təqdim edəcəklər. Bizi plagiatlıqda ittiham edənlər, əksinə, özləri bizim formaları “kopirovka” edirlər. Bakı Tikiş Evinin keçən il istehsalı cəmi 20 min ədəd olub, Azərbaycan orta ümumtəhsil məktəblərində isə 1 milyon 800 min nəfər şagird təhsil alır. 20 min nəfərin geyimini Bakı Tikiş Evi satırsa, geridə qalan formaları kim satır?”.
Bakı Tikiş Evinin məhsullarının kifayət qədər keyfiyyətli olduğunu deyən E.Əzimovun sözlərinə görə, “Sədərək”, “Binə” bazarlarında, eləcə də digər ticarət mərkəzlərində Bakı Tikiş Evi adından saxta məktəbli formaları satılır. O qeyd etdi ki, bu məktəbli formalarının parçaları keyfiyyətsizdir və gigiyenik tələblərə cavab vermir, geyim standartlarından uzaqdır. O dedi ki, bu gün müxtəlif işbazlar var və həmin işbazlar BTE-nin fəaliyyətini kölgəyə atmaq istəyirlər. Keyfiyyətsiz məktəbli geyimlərini bazardan çıxarmağın yollarının aradıldığını deyən E.Əzimovun sözlərinə görə, BTE-nin adından istifadə edənlərin aşkarlanaraq üzə çıxarılması üçün dəfələrlə əlaqədar qurumlara müraciət edilib. E.Əzimov onu da qeyd etdi ki, BTE istehsal etdiyi məktəbli geyimlərinə 1 il zəmanət verir.
İradə SARIYEVA
