“Sumqayıtdan fərqli olaraq, bizim başqa şəhərlərdə vəziyyət acınacaqlıdır. Şəhər nəqliyyatı bərbad vəziyyətdədir”. Bunu Prezident İlham Əliyev “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda çıxış edərkən deyib.
Ölkə başçısının sözlərinə görə, Bakı şəhərinin nəqliyyatı yaxşılaşdırılır: “İndi həm dövlət, həm özəl sektor xətti ilə daha səmərəli fəaliyyət göstərir. Xüsusilə mən özəl sektoru qeyd etmək istəyirəm. Çünki onlar da görürlər ki, dövlət xətti ilə gətirilən avtobuslar bütün standartlara cavab verir. Onların isə istifadə etdikləri avtobuslar artıq çoxdandır yararsız vəziyyətə düşüb. Ona görə məsuliyyətli sahibkarlar dərhal bu işlərlə məşğul olmağa başlayıblar. Əminəm ki, bundan sonra da həm özəl qurumlar, həm dövlət sektoru bu işdə fəal olacaqdır. Ancaq Sumqayıtdan fərqli olaraq, bizim başqa şəhərlərdə vəziyyət acınacaqlıdır. Şəhər nəqliyyatı bərbad vəziyyətdədir. İstifadə olunan avtobuslar heç bir meyarlara cavab vermir. Ona görə mən həm yerli icra orqanlarına, həm də Nəqliyyat, Rabitə və Yüksək Texnologiyalar Nazirliyinə müvafiq göstəriş vermişəm ki, mənə geniş məlumat versinlər, mövcud avtobus parkı nə vəziyyətdədir? Biz bu məsələni də həll etməliyik. Hər bir şəhərdə nəqliyyat yaxşı olmalıdır. Yollar yaxşıdır, nəqliyyat da yaxşı olmalıdır ki, vətəndaşlar mənzil başına, iş yerinə rahat çata bilsinlər”.
Həqiqətən də digər şəhərlərdə istər şəhərdaxili, istərsə də şəhərlərarası ictimai nəqliyyat müasir tələblərə cavab vermir. Bu da sərnişinlər üçün bir sıra problemlər yaradır.
“Köhnə avtobusların iştirakı ilə baş verən qəzalar daha ağır nəticələrə yol açır”
Sözügedən məsələ ilə bağlı fikirlərini “Bakı-Xəbər”lə bölüşən nəqliyyat sahəsi üzrə ekspert Elməddin Muradlının sözlərinə görə, digər şəhərlərdə ictimai nəqliyyatın vəziyyəti yaxşı deyil: “Bununla bağlı çoxsaylı problem var. Əsas problem ondan ibarətdir ki, ictimai nəqliyyat vasitələrinin istismar müddəti başa çatıb. Bu gün rayonlararası fəaliyyət göstərən avtobusların 70 faizinin ili köhnədir və faktiki olaraq, onların istismar müddəti başa çatıb. Eyni zamanda, şəhərdaxili nəqliyyat vasitələri də köhnəlib. Təəssüf ki, bununla bağlı müəyyən addımlar atılmır. Son illər əsasən Bakı şəhərində ictimai nəqliyyata vəsait ayrılır. Bölgələrdə bununla bağlı vəziyyət isə yaxşı deyil. Ona görə də bütün ölkə üzrə bu məsələlər tənzimlənməlidir. Çünki köhnə avtobuslarla hərəkət sərnişinlər üçün daha ciddi təhlükə deməkdir. Məsələ ondadır ki, köhnə avtobusların iştirakı ilə baş verən qəzalar daha ağır nəticələrə yol açır. Bu zaman ölən və yaralananlar daha çox olur. O baxımdan cənab Prezidentin toxunduğu məsələlər çox vacibdir. Rayonlarda avtobus parkı yenilənməlidir. Azərbaycan həm də turizm ölkəsi olduğu üçün bütün bunlar nəzərə alınmalıdır. Çünki ölkəyə gələn turistlərin əksəriyyəti ictimai nəqliyyat növlərindən istifadə edir. Bölgələrə gedərkən, geri qayıdarkən ictimai nəqliyyat vasitələrindən istifadə edirlər. Necə ki, biz xarici ölkələrə turist kimi səfərə gedəndə ictimai nəqliyyata üstünlük veririk, onlar da harasa gedəndə ictimai nəqliyyat vasitələrindən istifadə edirlər. Ona görə də Azərbaycana gələn turistlərə normal ictimai nəqliyyat xidmət etməlidir. Bu baxımdan hesab edirəm ki, bütün ölkə üzrə ictimai nəqliyyat parkı yenilənməlidir”.
Vidadi ORDAHALLI
