Ölkənin cənub bölgəsində müşahidə olunan güclü külək ciddi fəsadlara gətirib çıxarıb. Külək nəticəsində Lerikdə çoxsaylı işıq dirəyi aşıb. Artıq 4 gündür rayonun bir sıra kəndləri elektrik enerjisindən məhrum olublar.
Rayondan aldığımız məlumata görə, çoxsaylı işıq dirəyinin aşmasına baxmayaraq, onların bərpası istiqamətində işlər görülmür. Bu gedişlə rayonun bəzi yaşayış məntəqələrinin hələ bir neçə gün də işıqsız qalacağı gözlənir. Nəzərə alsaq ki, parlament seçkilərinə bir neçə gün vaxt qalıb, hələ də Lerik rayonunun ayrı-ayrı kəndləri işıqsızdırlar. Rayon sakinləri bildirirlər ki, küləyi bəhanə edib işıq dirəklərinin bərpası ilə əlaqədar, ümumiyyətlə, heç bir iş görülmür. Nəticədə sakinlər ölkədə və dünyada gedən proseslərdən xəbər tuta bilmirlər.
O da məlum oldu ki, küləyin belə böyük fəsadlara səbəb olmasının səbəbi işıq dirəklərinin bir çoxunun hələ də ağacdan olmasıdır. Məsələ ondadır ki, uzun illərdir rayonun ucqar dağ kəndlərinin elektrik dirəkləri yenilənmir. Dirəklər ağacdan olduğu üçün onların çoxu çürüyüb. Bir balaca külək əsən kimi, elektrik xətlərində açılmalar baş verir. Nəticədə hər dəfə kəndlər günlərlə, bəzən həftələrlə işıqsız qalırlar.
Güclü küləklə əlaqədar olaraq Kuman, Aran, Boykəndil, Kirəvud, Lələdulan, Ordahal, Musavar, Lələdulan, Soru, Ərdəbilə, Gürdəsər, Ləman, Lərmərud, Necü, Vamazgon, Davidoni, Haftoni, Əliabad və digər kəndlərdə elektrik enerjisi yoxdur. Sadalanan kəndlərdə elektrik dirəklərinin demək olar ki, hamısı ağacdandır. Bu səbəbdən rayon kəndlərinin çoxu 4 gündür zülmət içindədir.
“İşıq dirəkləri betondan, ya da dəmirdən olsaydı, külək onları aşıra bilməzdi”
Davidoni kənd sakini Nəcəf Əhmədovun sözlərinə görə, bundan əvvəl də bu cür küləklər olub və nəticədə işıq dirəkləri aşıb: “Ancaq hər dəfə elektrik dirəklərinin bərpası alayarımçıq xarakterli olub. Yamaq formasında bir sıra dirəkləri bərpa edirlər. Sonra yenə də bənzər problemlə üzləşirik. Bəzən elə olur ki, dirəklərin heç də hamısı bərpa edilmir. Hansı evdə yaşayış yoxdursa, həmin evlərin qarşısında yıxılan elektrik dirəkləri bərpa edilmir. Dəfələrlə şikayət etmişik, amma məhəl qoyan yoxdur. Hər dəfə güclü külək olanda daha çox dirək aşır. Çünki elektrik dirəklərinin əksəriyyəti ağacdandır. Hansı ki, işıq dirəkləri betondan, ya da dəmirdən olsaydı, külək onları aşıra bilməzdi”.
Yaranmış problemlə əlaqədar gün ərzində bir neçə dəfə Lerik Rayon Elektrik Şəbəkəsi ilə əlaqə yaratmağa çalışsaq da, bu mümkün olmadı.
Yeri gəlmişkən onu da qeyd edək ki, Prezident İlham Əliyev Vüqar Əhmədovu “Azərişıq” ASC-nin sədri vəzifəsinə təyin olunması ilə əlaqədar qəbul edərkən bildirib ki, ucqar dağ kəndlərinin elektrik təminatına xüsusi tiqqət yetirilməlidir: “Gələcəkdə, xüsusilə ucqar dağ kəndlərində enerji təsərrüfatına da böyük diqqət göstərilməlidir. Çünki biz demək olar ki, bütün şəhərlərdə artıq yeni yarımstansiyaların, transformatorların quraşdırılması nəticəsində problemi həll etmişik, ancaq bəzi kəndlərdə dirəklər köhnədən qalıbdır. Mən o kəndlərdə olarkən görürəm ki, hələ də taxta dirəklər qalmaqdadır. Onları müasir dirəklərlə dəyişdirmək üçün əlavə tədbirlər görülməlidir”.
Görünən odur ki, Lerikdə müvafiq qurumlar bununla bağlı problemlərin həllini sürətləndirməyə səy göstərmirlər. Bu yöndə səy göstərsəydilər, o zaman güclü külək rayonun elektrik təsərrüfatına bu qədər böyük zərər vurmazdı.
Vidadi ORDAHALLI
