Yanvarın 26-da Dövlət İmtaham Mərkəzi (DİM) tərəfindən doktoranturaya və dissertanturaya xarici dil üzrə keçirilən qəbul imtahanlarının nəticələri hələ açıqlanmasa da, namizədlər iddia edirlər ki, imtahanlar qeyri-şəffaf keçib, proses zamanı qayda-qanun pozuntularına yol verilməklə yanaşı, onlara haqsızlıqlar da olub.
Son günlər mətbuatda geniş müzakirəyə səbəb olan bu məsələdə haqlı tərəf kimdir? Doktoranturaya və dissertanturaya xarici dil üzrə keçirilən imtahanda neqativ halların baş verdiyi ilə bağlı iddialar nə dərəcədə əsaslıdır?
“İndidən imtahandan kimin keçib-keçməməsi barədə fikir yürütmək doğru deyil”
DİM-in mətbuat xidmətinin rəhbəri Xanlar Xanlarzadə “Bakı-Xəbər”ə bildirdi ki, hələ imtahanların nəticələri açıqlanmayıb. Hazırda cavabların yoxlanıldığını deyən X.Xanlarzadənin sözlərinə görə, namizədlərin imtahanın məzmunu ilə bağlı iradları yersizdir. Onun qeyd etdiyinə görə, imtahanın məzmunu ilə bağlı namizədlərə əvvəlcədən məlumat verilib. O dedi ki, bütün bloklar üzrə hansı bacarıqların yoxlanılacağı, imtahanın strukturu və məzmunu DİM-in təqdim etdiyi linkdə öz əksini tapıb. “Oxuyub-anlama blokunda qeyd olunur ki, təqdim olunacaq mətnlərdən biri akademik məzmunlu elmi-kütləvi, digəri isə ictimai-informativ, publisistik və digər janrlarda olacaq. Bu imtahanda doktorant olacaq şəxslərin öz sahəsinə aid bilikləri deyil, xarici dil üzrə bilikləri yoxlanılır. Mətnlər akademik məzmunlu olmaqla istənilən sahəyə aid ola bilər. Bundan əlavə, həmişə olduğu kimi, hər bir imtahanda asan, orta və çətin hesab oluna biləcək tapşırıqlardan istifadə olunur. Həmçinin, 40 sualın cavablandırılması üçün ayrılan 90 dəqiqə hələ normadan bir qədər yüksəkdir, əlavə 60 dəqiqə isə essenin yazılmasına ayrılıb. Müsabiqə şərtləri barədə də məlumatlısınız. Hər bir blok üzrə balların minimum 20 faizini (10 baldan 2 bal, 15 baldan 3 bal), ümumilikdə, imtahandan isə azı 25 bal (50 %) toplamış namizədlər keçid balını toplamış hesab edilir. Hazırda namizədlərin esseləri yoxlanılır və nəticələr elan olunmayıb. İndidən imtahandan kimin keçib-keçməməsi barədə fikir yürütmək doğru deyil. Dinləmə ilə bağlı onu deyə bilərəm ki, mətni səsləndirən cihazlarda bir problem yoxdur, sadəcə, əcnəbi dili dinləyib-anlama sizdən xüsusi bacarıq tələb edir. Bunun üçün xüsusi vərdişləriniz olmalıdır. Bu bacarıqlar, vərdişlər insanlarda lazımi səviyyədə olmadıqda bəziləri haqsız olaraq günahı qurğuda, səsləndirmədə və digər səbəblərdə axtarmağa meylli olurlar”.
X.Xanlarzadə, həmçinin, bildirdi ki, DİM-də Apelyasiya Komissiyası da yaradılıb və üç gün müddətində şikayəti olanlar ora müraciət ediblər: “Həmçinin, imtahanın keçirilməsi ilə əlaqədar DİM-də Apelyasiya Komissiyası yaradılıb. Apelyasiya Komissiyasına bu günlər ərzində 42 müraciət daxil olub və hər kəsə müvafiq izahatlar verilib. Nəticələr elan edildikdən sonra da 3 gün ərzində namizədlər komissiyaya müraciət edə bilərlər. Burada hər kəs dinlənilir və hər məsələyə dair izahat verilir” - deyə bildirən X.Xanlarzadə dedi ki, imtahanın nəticələri elan edildikdən sonra da DİM-də Apelyasiya Komissiyası narazıların şikayətinə baxacaq.
İradə SARIYEVA
