Son günlər həkimlər ciddi ajiotaj yaradan koronavirusun ilkin əlamətləri olaraq soyuqdəymə, zökəm, qızdırma simptomlarını həyəcan təbili kimi qiymətləndirirlər. Azərbaycanda bu virusa yoluxma halları aşkarlanmayıb. Lakin həkimlərin sözlərinə görə, virusun ölkəmizə keçmə risqi də istisna edilmir. Bu səbəbdən də Çindən ölkəmizə hər hansı bir formada nəyinsə gətirilməsi hazırkı şəraitdə məqbul sayılmır.
Çindən gələn hər bir məhsul xüsusi qaydada yoxlanılır. Lakin maraqlıdır, onlayn formada Çindən gətizdirilən hər hansı bir əşya necə yoxlanılır?
Nəzərə almaq lazımdır ki, son zamanlar onlayn alış-verişə daha çox üstünlük verilir. Digər ölkələrlə müqayisədə Çindən edilən onlayn alış-veriş daha ucuz olduğu üçün, vətəndaşlar məhz həmin ölkənin ticarət saytlarından nəsə sifariş verməyə üstünlük verirlər.
Ancaq o da məlumdur ki, son günlər Çində yayılan dəhşətli koronavirus nəticəsində həmin ölkədə karantin elan edilib. Bu xəstəlik nəticəsində Çində ölən insanların sayı günü-gündən artır. Açıqlanan son məlumatlara görə, Çində koronavirusa yoluxanların sayı 7711 nəfərə çatıb, virusdan ölənlərin sayı 170 nəfərdir.
Xəstəlik sürətlə qonşu ölkələrə də yayılır. Azərbaycana bu xəstəliyin keçməməsi üçün aidiyyəti qurumlar lazımi işlər görürlər. Lakin bununla yanaşı, Səhiyyə Nazirliyinin Gigiyena və Epidemiologiya Mərkəzi koronavirus təhlükəsi ilə əlaqədar Çindən onlayn sifarişləri dayandırmağı məsləhət görüb. Mərkəzin direktor müavini Afaq Əliyeva media nümayəndələrinə açıqlamasında bildirib ki, Çində karantin tədbirləri həyata keçirilirsə, hər kəs özünü qorumaq üçün onlayn sifarişləri dayandırmalıdır: “Düzdür, həmin məhsullar gömrük məntəqələrində müayinədən keçirilir, yoxlanılır, amma yenə də alış-verişi, bütün əlaqələri məhdudlaşdırmaq olar. Çünki koronavirus haqqında Ümumdünya Səhiyyə Təşkilatının belə tam məlumatı yoxdur. Virus hələ öyrənilir. Ona görə bir qədər ehtiyatlı olmaq lazımdır”.
Maraqlıdır, Çindən onlayn alış-verişi qadağan etmək olarmı? Olarsa, bu hansı formada olacaq?
“Çindən onlayn yolla gələn mallar Gömrük Komitəsinin, “Azərpoçt”un daşıma şirkətinin prosedurundan keçməlidir”
"Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz bildirdi ki, Dövlət Gömrük Komitəsi, “Azərpoçt” Məhdud Məsuliyyətli Cəmiyyət bu məsələdə daha məsuliyyətli olmalıdırlar: “Çindən onlayn yolla gələn mallar Gömrük Komitəsinin, “Azərpoçt”un daşıma şirkətinin prosedurundan keçməlidir. “Azərpoçt”un mərkəzi daşıma məntəqəsi, gömrük qurumları var. Bu qurumların məsuliyyəti gücləndirilməlidir. Müəmmalı məhsullar ilk növbədə gömrüyə və poçta daxil olur. Ona görə də bu qurumlar ehtiyatlı olmaqla bağlı açıqlama verməlidirlər. Bu quruma daxil olan siyasi məqsədli malların skanerdən keçirilməsi, təhlükəsizlik tədbirləri ilə bağlı görülən işləri gücləndirməlidirlər”.
Həmsöhbətimiz onu da vurğuladı ki, aidiyyəti qurumlar əhaliyə xəbərdarlıq edə, onlayn alış-verişin müəyyən müddətə məhdudlaşdırılması ilə bağlı vətəndaşlara müraciət edə bilər: “Məsuliyyət daşıyanlar həm özləri işlərini nizamlamalı, həm də belə açıqlamalar verməlidirlər”.
Günel CƏLİLOVA
