Çində koronavirusun yayılması ilə əlaqədar olaraq bu gün bir çox ölkə Çinlə əlaqələrini müvəqqəti olaraq dayandırıb. Artıq Azərbaycanda da koronavirusa qarşı müəyyən qabaqlayıcı addımlar atılıb. Nazirlər Kabinetində koronavirus epidemiyasına qarşı qabaqlayıcı tədbirlərin görülməsinə dair məsələlər müzakirə edilib.
Koronavirus Çinin bir çox sahəsinə təsir göstərir. O cümlədən, Çin restoranlarının fəaliyyəti də sual altındadır. Virusun qeydə alındığı bölgədə Çin restoranlarının fəaliyyəti dayandırılıb. Ancaq nəzərə almaq lazımdır ki, Çin restoranları tək adıçkilən ölkədə deyil, dünyanın hər bir ölkəsində fəaliyyət göstərir. O cümlədən, ölkəmizdə də. Ölkəmizdə fəaliyyət göstərən Çin restoranlarına maraq yüksəkdir. Lakin son günlər Çində yayılan ölümcül koronavirus həmin restoranlara insanların münasibətini dəyişir.
Məlumdur ki, Çində yayılan dəhşətli virusla bağlı Azərbaycan hökuməti qabaqlayıcı tədbirlərin görülməsi haqqında tapşırıqlar verib.
Səhiyyə Nazirliyi Çin restoranlarına gedilməməsi haqqında əhaliyə xəbərdarlıq edib. Səhiyyə Nazirliyinin Gigiyena və Epidemiologiya Mərkəzinin direktor müavini Afaq Əliyeva media nümayəndələrinə açıqlamasında deyib ki, insanlar bir müddət Çin restoranlarına getməsinlər: “Ümumiyyətlə, Çin qidalarından istifadə etməsinlər. Koronavirus barədə geniş araşdırmalar aparılanadək bu restoranlara getmək məsləhət deyil. Azərbaycan Qida Təhlükəsizliyi Agentliyi (AQTA) və Ümumdünya Səhiyyə Təşkilatı (ÜST) tərəfindən təhlükənin olmaması barədə məlumat veriləndən sonra insanlar rahat şəkildə bu restoranların xidmətlərindən istifadə edə bilərlər”.
Qeyd edək ki, Çin restoranında hazırlanan təamlar üçün lazım olan məhsullar məhz həmin ölkədən gətirilir. Belə bir anda əhalinin sağlamlığı üçün həmin restoranlara vəziyyət sakitləşənə qədər gedilməməsinin tövsiyə edilməsi ekspertlər tərəfindən müsbət qarşılanır.
Ancaq Çin restoranlarında çalışanlar isə iddia edirlər ki, son günlər Çində yayılan və insanların ölümünə səbəb olan koronavirusla bağlı Azərbaycandakı restoranların sahibləri oradan məhsul gətirməyi dayandırıblar. Onlar məhsulları Avropadan və ya Bakının özündən aldıqlarını bildirirlər.
İnzibatçılar isə bildirirlər ki, virusa görə insanlar narahat olsalar da, onların müştəriləri azalmayıb.
Çin restoranının sahibi - Bao Li Cun: “Çin yeməklərinin hazırlanmasında istifadə olunan ərzaqların hamısı Azərbaycandan alınır”
Bakıda fəaliyyət göstərən Çin restoranlarından birinin sahibi Bao Li Cun bizimlə söhbətində bildirdi ki, restoranda təklif olunan menyuda əsasən Çin yeməkləri üstünlük təşkil edir. Lakin buna baxmayaraq, Çin yeməklərinin hazırlanmasında istifadə olunan ərzaqların Azərbaycandan alındığını iddia edir: “Bu ərzaqlardan bişirilən yeməkləri isə müştərilərə çinli aşpaz təqdim edir. Burada bizdə qorxu yoxdur. Burada hamısı Çin yeməkləridir. Ərzaqların hamısını Bakıdan alıram. Toyuq əti, mal əti, qoyun əti, ördək əti, lafşa, düyü, vəssalam".
“Jasmin” restoranı: “Öncəki aylarla müqayisədə müştərilərin sayında azalma var”
"Jasmin” Çin restoranından öyrəndiyimiz məlumata görə, öncəki aylarla müqayisədə müştərilərin sayında azalma var: "Bizim həm yerli, həm də əcnəbi müştərilərimiz var. Lakin son bir ayda müştərilərimizin sayı azalıb. Bizim məhsullarımız da nisbətən yaxın ölkələrdən, şəhərlərdən gətirilir. Amma bu günədək heç vaxt Çindən məhsul gətirməmişik".
Günel CƏLİLOVA
