23/09/2020 20:49
728 x 90

Azərbaycan qorxulu “Çin virusu” ilə fövqəladə mübarizə rejiminə keçdi - YENİLƏNDİ

Prezidentin tapşırığı ilə müşavirə keçirildi, gücləndirilmiş iş rejimi tətbiq edildi

img

Prezident İlham Əliyevin tapşırığına əsasən Nazirlər Kabinetində, Ümumdünya Səhiyyə Təşkilatının və Çin Xalq Respublikası hökumətinin elan etdiyi kimi, ÇXR-in Uhan şəhərində yayılmış və artıq dünyanın başqa regionlarında da qeydə alınmış koronavirus epidemiyasına qarşı qabaqlayıcı tədbirlərin görülməsi üçün müşavirə keçirilib.

Nazirlər Kabinetinin Mətbuat Xidmətindən “Trend”ə verilən məlumata görə, Baş nazirin sədrlik etdiyi müşavirədə aidiyyəti dövlət qurumlarının rəhbərləri iştirak edib.

Müşavirədə epidemiyanın Azərbaycana daxil olmasının qarşısının alınması üçün müzakirələr aparılıb.

Müşavirənin yekununda belə hallar üçün nəzərdə tutulmuş aşağıdakı tədbirlərin görülməsi haqda qərar qəbul edilib:

- sərhəd-keçid məntəqələrində gücləndirilmiş iş rejiminə keçilməsi;

- ÇXR-dən, xüsusilə epidemiya zonasından ölkəyə gələn bütün şəxslərin mütləq şəkildə ciddi tibbi müayinədən keçirilməsi və nəzarət altına alınması;

- xüsusi risqli hesab olunan və virusun keçə biləcəyi ərzaq məhsullarının siyahısının hazırlanması və ərzaq bazarında həmin məhsullara nəzarətin gücləndirilməsi;

- səhiyyə ocaqlarında qaynar xətlərin yaradılması;

- virus və onunla mübarizə metodları haqda əhali ilə maarifləndirmə işlərinin aparılması;

- vəziyyətlə bağlı əhaliyə mütəmadi məlumat verilməsi.

Əhalinin nəzərinə çatdırılır ki, ölkədə belə vəziyyətlərdə ehtiyacın yarana biləcəyi bütün tibbi ləvazimatlar kifayət qədərdir.

O da vurğulanıb ki, hazırda ölkəmizdə belə xəstəliyə yoluxma halları müşahidə olunmayıb, Azərbaycanda əhalinin sağlamlığı ilə bağlı vəziyyət dövlətin tam nəzarətindədir və narahatlıq üçün heç bir əsas yoxdur.

Müşavirədə Səhiyyə nazirinin rəhbərliyilə və aidiyyəti qurumların iştirakı ilə işçi qrupun yaradılması qərarı qəbul edilib.

Tədbirlərin görülməsində Ümumdünya Səhiyyə Təşkilatının müvafiq tövsiyələri nəzərə alınır, Azərbaycanın ÇXR-dəkı səfirliyi və ÇXR-in Azərbaycandakı səfirliyi ilə sıx əlaqə saxlanır. Habelə, Azərbaycanın Çindəki səfirliyi ÇXR-in dövlət qurumları və Çində olan Azərbaycan vətəndaşları ilə daimi təmasdadır.

Koronavirus 2019-nCoV virusuna qarşı həyata keçiriləcək əks-epidemik tədbirlərlə bağlı “Tibbi Ərazi Bölmələrini İdarəetmə Birliyi"nin (TƏBİB) “İnfeksion xəstəliklərə nəzarət üzrə işçi qrupu”nun Dövlət Gömrük Komitəsinin rəhbər şəxsləri ilə birgə iclası keçirilib.

İclası giriş sözü ilə açan TƏBİB-in İdarə Heyətinin sədri Ramin Bayramlı Çin Xalq Respublikasında 2019-cu ilin dekabr ayında yeni aşkar edilmiş Koronavirus 2019-nCoV virusuna qarşı respublikanın sərhəd-keçid məntəqələrində və müalicə müəssisələrində təcili olaraq yerinə yetirilməli infeksion nəzarət tədbirlərindən danışıb. İclasda sözügedən virusun dünyada və respublika səviyyəsində mövcud epidemioloji vəziyyəti barədə, virusun növləri, yayılma arealı, virusun xarici mühitdə davamlılığı, xəstəlikdən mövcud ölüm səviyyəsi barədə məlumat verilib.

Qeydə alına biləcək 2019-nCoV infeksiyasına qarşı əks-epidemik tədbirlərin Səhiyyə Nazirliyi ilə koordinasiyalı əməkdaşlıq şəraitində həyata keçirilməsi, respublikanın hər bir sərhəd-keçid məntəqəsində ölkəyə daxil olan yerli və əcnəbi vətəndaşların infeksiya barədə maarifləndirilməsi, hər bir sərhəd-keçid məntəqəsində ölkəyə daxil olan şəxslərin termal kameradan keçmələrinin təmin edilməsi, ÇXR-dən təyyarə ilə gələn sərnişinlərin isə məsafədən termometriya edilməsi, infeksiyaya şübhəli olan şəxslərin sərhəd-keçid məntəqələrinin karantin otaqlarında izolyasiya edilməsi, şübhəli hal barədə “103” təcili yardım xidmətinin məlumatlandırması, Bakı şəhərində yerləşən sərhəd-keçid məntəqələrində aşkar edilmiş şəxslərin həmin karantin otaqlarından “103” təcili yardım xidməti ilə daşınaraq xüsusi ayrılmış xəstəxanaların infeksion şöbələrinə yerləşdirilməsi, Respublikanın rayonlarında yerləşən sərhəd-keçid məntəqələrinə uyğun olaraq həmin rayonların Mərkəzi Rayon Xəstəxanalarının infeksion şöbələrində iki infeksion palatanın hazırlıq vəziyyətinə gətirilməsi barədə qərar qəbul edilib.

Qeyd edək ki, tibb müəssisələrində sanitariya-gigiyena, əksepidemik rejimlərin tələblərinin yerinə yetirilməsi və dezinfeksiya tədbirlərinin həyata keçirilməsi işi gücləndirilib, kəskin respirator virus infeksiyasına şübhəli xəstələrin, xüsusən uşaqların və yaşlı əhalinin hospitalizasiyası üçün xüsusi palatalar ayrılıb.

  • Nəsib Quliyev: “Hesab edirəm, dövlət başçısının bu yöndə verdiyi tapşırıq ölkə vətəndaşlarının, eləcə də ölkəmizə gələn qonaqların təhlükəsizliyinin təmin olunması baxımından böyük dəyərə malikdir”

Bu müşavirənin keçirilməsinin koronavurus  epidemiyası ilə bağlı təhlükənin  qarşısının alınmasında əhəmiyyətli rol oynayacağını deyən professor Nəsib Quliyev “Bakı-Xəbər”ə açıqlamasında bildirdi ki, Azərbaycan dövləti hər zaman dünyada bu cür təhlükəli hallar baş verdikdə əvvəlcədən təhlükəsizlik tədbirləri görür. “Cənab Prezidentin tapşırığı ilə Nazirlər Kabinetində koronavirusla bağlı keçirilən müşavirənin əhəmiyyəti çox böyükdür və bunu yüksək qiymətləndirirəm. Hesab edirəm, dövlət başçısının bu yöndə verdiyi tapşırıq ölkə vətəndaşlarının, eləcə də ölkəmizə gələn qonaqların təhlükəsizliyinin təmin olunması baxımından böyük dəyərə malikdir.  Onu da deyim ki, bununla bağlı artıq Səhiyyə Nazirliyinə əmr imzalanıb. Dövlət gömrüyündə, sərhəd keçid məntəqələrində təhlükəsizlik tədbirləri görülüb və ölkəmizə daxil olanlar xüsusi müayinədən keçirilir. Çin Xalq Respublikasından ölkəmizə gələn insanlarla bağlı tədbirlər aparılır. Eyni zamanda ölkə daxilində də bu istiqamətdə işlər aparılır. Düşünürəm ki, bizim ölkədə ciddi təhlükəsizlik tədbirləri görüldüyü üçün bu təhlükəli epidemiya Azərbaycandan yan keçəcək. Prezdentin göstərişilə artıq qabaqlayıcı tədbirlər həyata keçirilir. İlk növbədə ölkəmizə gəlib-gedən adamların vastəsilə həmin təhlükəli virusun ölkəmizə gəlməsinin qarşısını almaq üçün tədbirlər görürük. Bizim ölkəmizdə koronavirus yoxdur. Sərhəd keçid məntəqlərində artıq “teplovizorlar”ın köməkliyi ilə cihazlar tətbiq olunur. Bilirsiz ki, artıq sərhəd keçid məntəqələrində, xəstəxanalarda gücləndirilmiş iş rejiminə keçilib və bütün səhiyyə sistemi, eləcə də bütün əlaqədar qurumlar bu yöndə səfərbər olunub” deyə professor bildirdi.

  • Qabil Hüseynli: Azərbaycan dövlətinin koronavirusla mübarizə istiqamətində həyata keçirməyə başladığı işlərin, qabaqlayıcı tədbirlərin əhəmiyyəti böyükdür”

Tanınmış politoloq, professor Qabil Hüseynli də hesab edir ki, Prezidentin müvafiq tapşıığı ilə keçirilən müşavirə koronavirusun ölkəmizə gəlməsinin qarşısının alınmasında əhəmiyyətli rola malikdir: “Bu çox təhlükəli bir virusdu. Hələ ki, dünyada onun nə peyvənd, nə də müalicə edilməsinin yolları tapılıb. Ən qorxulusu da odur ki, o, Çİndən digər ölkələrə də yayılır. Buna görə də, Azərbaycan dövlətinin koronavirusla mübarizə istiqamətində həyata keçirməyə başladığı işlərin, qabaqlayıcı tədbirlərin əhəmiyyəti böyükdür. Səhiyyə Nazirliyi bununla bağlı xüsusi əmr verib və bu əmrə uyğun olaraq Bakı şəhərində və rayonların mərkəzi xəstəxanalarında bu vurusa yoluxan xəstələrin müalicəsi üçün xüsusi palatalar ayrılıb, sərhəd keçid məntəqlərində gücləndirilmiş  iş rejiminə keçilib. Hesab edirəm ki, koronavirus Azərbaycana gəlməyəcək, çünki bizdə indidən güclü tədbirlər görülür. Dövlətin öz vətəndaşlarını belə vəziyyətlərdə qoruması onun əsas vəzfələrindən biridir və Azərbaycan dövləti də öz vəzifəsini yerinə yetirir” - deyə Q.Hüseynli vurğuladı.

İradə SARIYEVA

Son xəbərlər