23/09/2020 21:28
728 x 90

Ötən il Avropadan Azərbaycana gəlmiş turistlərin sayında xeyli artım olub – yeni təzahürün səbəbləri...

Çingiz İsmayılov: “Bir sıra amillərin üst-üstə düşməsi belə əlverişli vəziyyətin yaranmasına gətirib çıxarır”

img

Ötən il Azərbaycana gələn turistlərin sayı artıb. Belə ki, 2019-cu ildə Azərbaycana dünyanın 193 ölkəsindən 3 milyon 170,4 min və ya əvvəlki illə müqayisədə 11,3 faiz çox əcnəbi və vətəndaşlığı olmayan şəxs gəlib.

Gələnlərin 29,4 faizi Rusiya Federasiyası, 22,9 faizi Gürcüstan, 10,0 faizi Türkiyə, 8,1 faizi İran, 3,4 faizi Səudiyyə Ərəbistanı, 2,2 faizi Birləşmiş Ərəb Əmirlikləri, 2,1 faizi Hindistan, 1,9 faizi Ukrayna, hər birindən 1,6 faiz olmaqla Türkmənistan və İraq, hər birindən 1,5 faiz olmaqla Qazaxıstan, Pakistan və İsrail, 1,2 faizi Böyük Britaniya, 11,0 faizi digər ölkələrin vətəndaşları, 0,1 faizi isə vətəndaşlığı olmayan şəxslər olub. Gələnlərin 66,6 faizini kişilər, 33,4 faizini isə qadınlar təşkil edib.

Ölkəmizə 2019-cu ildə gələnlərin sayında daha çox artım Türkmənistan (84,2 faiz), Hindistan (66,8 faiz), Çin (62,4 faiz), Misir (55,6 faiz), Malayziya (54,9 faiz) vətəndaşları arasında qeydə alınıb.

MDB ölkələrindən gələnlərin sayı 9,3 faiz artaraq 1141,5 min nəfər, Körfəz ölkələrindən gələnlərin sayı isə əvvəlki illə müqayisədə 0,9 faiz azalaraq 549,0 min nəfər olub.

Diqqətçəkən məqamlardan biri də Avropa İttifaqı ölkələrindən gələnlərin sayında ciddi artım olmasıdır. Adətən, sözügedən ölkələrdən gələnlərin sayı elə də çox olmurdu. Ancaq ötən il Avropa İttifaqına üzv ölkələrdən gələnlərin sayı 21,3 faiz artaraq 136,5 min nəfər təşkil edib. Bu da müsbət göstərici hesab edilir. Çünki Aİ ölkələrindən gələn turistlər daha imkanlı olduğundan, getdikləri ölkədə daha çox vəsait xərcləyirlər. Bütün hallarda, Aİ ölkələrindən Azərbaycana gələn turistlərin sayının artması nəyin göstəricisidir?

  • “Bu, həmin turistlərin daha çox vəsait xərcləməsi deməkdir ki, nəticədə Azərbaycanın iqtisadiyyatı bundan qazanacaq”

Məsələyə münasibət bildirən turizm sahəsi üzrə ekspert Çingiz İsmayılov Aİ ölkələrindən Azərbaycana turist axınının artmasını bir sıra amillərlə əlaqələndirdi: “Bunun müxtəlif səbəbləri var. Əvvəla Azərbaycan Avropada müxtəlif turizm sərgilərində iştirak edir. Həmin sərgilərdə ölkə barədə təbliğat aparılır. Mətbəx sərgiləri keçirilir və bu, oradakı vətəndaşların diqqətini cəlb edir. Siyasi tədbirlərdə Prezident İlham Əliyev, bir sıra qurumların rəsmiləri çıxış edirlər. Bütün bunlar, nəticə etibarilə, Avropadakı turistlərin Azərbaycana marağını artırır. Deməyim odur ki, bunu bir səbəblə əlaqələndirmək olmaz. Bir sıra amillərin üst-üstə düşməsi belə əlverişli vəziyyətin yaranmasına gətirib çıxarır. Onu da nəzərə almaq lazımdır ki, Avropada hələlik Azərbaycan barədə tam təəssürat yoxdur. Ölkəmiz barədə tam təəssürat formalaşsa, o zaman Avropadan gələn turistlərin sayı qat-qat çox olacaq. Bu gün Gürcüstanla müqayisədə Avropadan Azərbaycana az turist gəlir. Bunun müxtəlif səbəbləri var. Gürcüstan coğrafi baxımdan Avropaya daha yaxındır, açıq dənizə çıxışı var və dini faktor da buna öz təsirini göstərir. Bütün bunlara baxmayaraq, Avropada Azərbaycan barəsində müxtəlif pozitiv məlumatların yayılması, ölkədə stabilliyin olması və digər amillər vəziyyəti xeyrimizə dəyişir. Hesab edirəm ki, Aİ ölkələrindən daha çox turistin gəlməsi iqtisadi baxımdan bizə sərfəlidir. Bu həmin turistlərin daha çox vəsait xərcləməsi deməkdir ki, nəticədə Azərbaycanın iqtisadiyyatı bundan qazanacaq. Ona görə də elə etməliyik ki, Avropa ölkələrindən gələn turistlərin sayı daha çox olsun”.

Vidadi ORDAHALLI

Son xəbərlər