Adil Qeybulla: “İcbari tibbi sığorta ilə bağlı TƏBİB-in verdiyi zərf qənaətbəxş deyil”
Məlum olduğu kimi, cari ilin əvvəlindən etibarən ölkəmizdə icbari tibbi sığorta tətbiq olunmağa başlayıb. İcbari tibbi sığorta ilk olaraq bölgələrdə tətbiq olunur. Ancaq icbari tibbi sığortanın tətbiqi bəzi bölgə xəstəxanalarında problem yaratmağa başlayıb. Belə ki, Ağsu Rayon Mərkəzi Xəstəxanasında, sözün əsl mənasında, xaos yaşanır. Tibbi sığorta qanunu ilə razılaşmayan həkimlər kütləvi surətdə dövlət xəstəxanasından çıxaraq özəl klinikalar açmağa başlayıblar. Hazırda xəstəxananın dəhlizlərində onlarla xəstə həkim gözləyir.
Ağsu rayon sakini Nurlan Mirkazımlı media nümayəndələrinə açıqlamasında bildirib ki, hazırda ağır vəziyyətdə olan anası xəstəxanada baxımsız vəziyyətdədir: “Anam ağır xəstədir, əməliyyat olunmalıdır. Yanvarın 27-si anamı əməliyyat üçün təcili olaraq xəstəxanaya apardıq. Saatlarla xəstəxananın dəhlizində gözləsək də, həkim tapa bilmirik. Xəstəxananın həkimlərinə zəng etsək də, heç biri telefonları açmır. Mən bununla bağlı Səhiyyə Nazirliyinin “qaynar xətt”inə zəng etdim, Səhiyyə Nazirliyi də mənim nömrəmi “qara siyahı”ya saldı. Hazırda xəstəxananın dəhlizlərində ağır vəziyyətdə olan xəstələr həkim gözləyirlər. Bu qədər özbaşınalıq olarmı?”
Məsələ ilə bağlı İcbari Tibbi Sığorta üzrə Dövlət Agentliyinə müraciət etdik. Lakin agentlikdən bizə cavab verən olmadı.
- “Hansı xəstəliklərin icbari sığortaya daxil olduğu, hansının daxil olmadığı açıqlanmalıdır”
Professor, tibbi ekspert Adil Qeybulla bizimlə söhbətində qeyd etdi ki, icbari tibbi sığorta ilə bağlı TƏBİB-in verdiyi zərf qənaətbəxş deyil: “Burada aydın olmayan məqamlar var. Yaxşı olardı ki, buna aydınlıq gətirilsin, mütəmadi olaraq bununla bağlı maarifləndirmə işləri aparılmalıdır. Vətəndaş, ən azı, bilməlidir ki, onun hüquqları nədən ibarətdir. Burada xeyli qeyri-müəyyənlik var. İkinci məsələ ondan ibarətdir ki, həkimlərin fiksə olunmuş maaşları təyin olunmadan icbari tibbi sığortadan söhbət gedə bilməz. Daha çox xəstəyə baxmaqla məvacibin müəyyənləşməsi bunun subyektiv faktorlara yol açması deməkdir. Bu, peşəkarlığın qorunması baxımından da ziyanlıdır”.
Həmsöhbətimiz hesab edir ki, ilk növbədə, həkimlərin fiksə olunmuş əməkhaqları təyin olunmalıdır, bundan sonra isə öz normativlərindən daha artıq xəstəyə baxan həkimlərin gəlirlərinə əlavə edilməlidir: “Dünya ölkələrində məsələlər bu cür həll olunur, bizdə də belə olmalıdır. İkinci tərəfdən isə bütün məsələlərin izahını orada tapmaq mümkün deyil. Məsələn, bir vətəndaşın il ərzində xəstəxanaya neçə dəfə müraciət etmək hüququnun olması bilinmir. Kim nə vaxt istəsə xəstəxanaya gəlsə, xaos yaranar. Bundan başqa, hansı xəstəliklərin icbari sığortaya daxil olduğu, hansının daxil olmadığı göstərilməlidir. Bütün bunları tənzimləmək, növbəlilik sistemi yaratmaq lazımdır. Bu kimi məsələlər həll olunmadığı üçün, hazırda bölgə xəstəxanalarında xaos yaşanır. Burada nə həkimləri qınamaq lazımdır, nə də xəstələri”.
Günel CƏLİLOVA
