23/09/2020 21:37
728 x 90

Belə təhsil şöbə müdirləri həbs edilməsə, təhsil buxovlardan tam xilas ola bilməz

img

Təhsil naziri Ceyhun Bayramov keçirdiyi brifinqdə deyib ki, ötən il 10 məktəb rəhbəri, direktor və direktor müavinlərinin müqavilələrinə xitam verilib, işdən kənarlaşdırılıb. Nazir bildirib ki, ötən il korrupsiya faktlarına görə 6 rayon təhsil şöbəsinin rəhbərinin müqavilələrinə xitam verilib.

O qeyd edib ki, həmin dövrdə 10 rayon təhsil şöbəsinin əməkdaşına, 3 ərazi maliyyə-hesablaşma mərkəzinin rəhbərinə inzibati tədbirlər təqdim edilib: “Bir sıra təhsil müəssisələrində ciddi faktların olması nəticəsində 7 halda materiallar hüquq-mühafizə orqanlarına hüquqi qiymət verilməsi üçün təqdim edilib”.

Nazir qeyd edib ki, müqavilələrinin müddəti sona çatan 80 nəfər məktəb rəhbəri davamlı olaraq aşağı nəticələr göstərdiyi və məktəbi idarəetmədə bir sıra pozuntulara yol verdikləri üçün növbəti dəfə müqavilələrinin uzadılmaması barədə qərar qəbul edilib: “Əfsuslar olsun ki, bu istiqamətdə hələ də pozuntular olan hallarla rastlaşırıq. Belə olan təqdirdə, bu il də belə hallar olacaqsa, Təhsil Nazirliyi tərəfindən sərt formada ciddi reaksiya veriləcək”.

Göründüyü kimi, Təhsil naziri rəhbərlik etdiyi sahədə korrupsiya və digər qanunazidd olan əməllərin qarşısını almaq üçün kifayət qədər vəzifəli şəxsin işindən azad edildiyini bildirib.  Təhsildə olan neqativliklərin aradan qaldırılması istiqamətində atılan bu inzibati addımları həmin sahədəki vəziyyəti nizama salmaq baxımından nə dərəcədə əhəmiyyətli saymaq olar?

  • Məlahət Mürşüdlü: “Hüququn imkan verdiyi çərçivədə sərt cəzalar tətbiq edilməlidir ki,  başqaları üçün də görk olsun”

Təhsil eksperti Məlahət Mürşüdlü qəzetimizə açıqlamasında bildirdi ki, belə neqativliklərin aradan qaldırılması üçün mütləq hansısa tədbirlər görülməlidir: “Təbii ki, atılan bütün inzibati addımların bir tərbiyəvi əhəmiyyəti olur. Ancaq gəlin məsələyə bir qədər hüquqi aspektdən yanaşaq. Söhbər rüşvətdən və korrupsiyadan gedirsə, bu, cinayət əməli sayılır. Belə əməldə məsuliyyəti yalnız alan yox, həm də verən daşıyır. Biz çalışıb elə etməliyik ki, rüşvəti verən də buna meylli olmasın. Qanunvericilikdə bunun hər ikisi üçün cəza nəzərdə tutulur. Bu səbəbdən də bir qədər də sərt cəzalar tətbiq olunmalıdır. Biz təhsilimizi xilas etmək istəyiriksə, yalnız işdən çıxarmaqla kifayətlənmək olmaz. Hüququn imkan verdiyi çərçivədə sərt cəzalar tətbiq edilməlidir ki, başqaları üçün də görk olsun. İstənilən halda, bu istiqamətdə görülən işlərin tərbiyəvi əhəmiyyətinin ola biləcəyini düşünürəm. Təhsildə rüşvətin olması millətin gələcəyini məhv edir. Bununla daha ciddi üsullarla mübarizə aparılmalıdır”.

Məhəmmədəli QƏRİBLİ

Son xəbərlər