Məlum olduğu kimi, yanvarın 22-də Azərbaycan Respublikasının Prezidenti İlham Əliyev Davos Dünya İqtisadi Forumu çərçivəsində “Strateji baxış: Avrasiya” mövzusunda keçirilən panel iclasında iştirak edib.
Görüş iştirakçıları region üçün 2020-ci ildə strateji prioritetləri müzakirə ediblər. Qeyd edək ki, sessiyanın gündəliyinə iqtisadi imkanların yaradılması, geosiyasi gərginliklərin idarə edilməsi və texnoloji tətbiqetmənin sürətlənməsi kimi məsələlər daxil edilmişdi.
Müzakirə olunan məsələlərdən biri də əhalinin təbii artımının iqtisadi artım səviyyəsinə uyğunlaşdırılması idi.
Prezident İlham Əliyev qeyd edib ki, bizim iqtisadi artımımız əhalinin artımına uyğun gəlməlidir. Müstəqillik illərində əhalimizin sayı 7 milyondan 10 milyona qədər artdı. Beləliklə, əhaliyə əlavə infrastruktur, əlavə ərzaq təminatı tələb olunur: “Bizim əhalimiz hər il 100 mindən çox artır. Bu isə o deməkdir ki, bizə ən azından ildə 100 min iş yeri lazımdır. Bu, asan deyil. Buna görə də hökumət bu məsələ ilə məşğul olacaq. Biz yoxsulluğu bugünkü səviyyədə - 5 faizdən aşağı səviyyədə saxlamağa çalışacağıq”.
“Əhalinin artım tempi ilə iqtisadi artım bərabər şəkildə getməlidir”
Azərbaycanın iqtisadi artımının əhalinin artımına uyğunlaşdırılması barədə fikir bildirən iqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, Prezidentin Davos Forumunda iştirakı ölkəmiz üçün əhəmiyyətlidir: “Prezident İlham Əliyev hər il İsveçrənin Davos şəhərində Dünya İqtisadi Forumunun toplantısında iştirak edir. Bu, olduqca əhəmiyyətli hadisədir və Azərbaycan kimi inkişaf etməkdə olan ölkələr üçün vacibdir”.
P.Heydərovun sözlərinə görə, müstəqillik illərində əhalinin artımı 7 milyondan 10 milyona çatıb. Bu yaxşı göstəricidir: “Əhalinin artım tempi ilə bağlı Prezident dəfələrlə öz çıxışlarında bu məsələyə toxunub. Əhalinin artım tempi ilə iqtisadi artım bərabər şəkildə getməlidir. Bunun üçün açılan iş yerlərinin sayı artmalıdır. Eyni zamanda, artan əhalinin müvafiq tələbləri qarşılıqlı şəkildə ödənilməlidir. İqtisadiyyat inkişaf edərsə, istehsal sahələri da yaradılar. Belə olan halda, açılacaq iş yerlərinin sayı da artar. Bu məsələ hökumətin qarşısına çoxdan qoyulub. Prezidentin iştirakı ilə keçirilən müşavirələrdə də ölkə başçısı bu məsələyə xüsusi olaraq toxunub. Məlumat üçün bildirim ki, bu istiqamətdə müvafiq addımlar atılmaqda davam edir”.
Günel CƏLİLOVA
