Məlum olduğu kimi, Prezident İlham Əliyevin sərəncamı ilə Ramil Usubov Daxili İşlər naziri vəzifəsindən azad edilərək, Prezident yanında Təhlükəsizlik Şurasının katibi təyin olundu.
Onun yerinə isə Daxili İşlər nazirinin birinci müavini vəzifəsini tutan Vilayət Eyvazov gətirildi. Peşəkar və bir o qədər də qətiyyətli kadr kimi tanınan Eyvazovun polisdə islahatlar aparacağı gözlənilən idi. Yeni nazirin islahatlara Yol Polisi sistemindən başlaması təəccüblü görünmədi. Çünki son illər polis orqanlarının nüfuzuna ən çox xələl gətirən sahə kimi adı çəkilən Yol Polisində islahatların həyata keçirilməsi əsas hədəflərdən biridir.
Son dövlər ölkə rəhbərliyi sosial problemləri dərinləşdirən, vətəndaş-məmur təmasının intensiv olduğu sektorlarda dəyişikliklər apardığı, müsbətyönümlü islahatlara start verdiyi göz önündədir. İndi bu siyasətin Yol Polisi sistemində də davam etdirilməsinə zərurət yaranıb. Azərbaycanda vətəndaş-məmur ünsiyyətinin ən çox olduğu sahələrdən biri də Yol Polisi Xidmətidir. Onu da xatırladaq ki, mətbuatda Daxili İşlər Nazirliyi və polis sistemi ilə bağlı yazılan tənqidi materialların böyük əksəriyyəti məhz Yol Polisinin fəaliyyəti ilə bağlı olur. Sürücülərin yollarda əsassız saxlanması, yeri gəldi-gəlmədi, sənədlərin tələb olunması halları artıq Yol Polisində dəyişiklikləri labüd edir.
Təkcə bu neqativ hallar deyil: "MERO”larda bazar açılıb, sürücülük vəsiqəsi 1000-1200 manatdan satılır, sürücünün məlumatı olmadan sistemə vurulan cəriməyə görə faizlə ödəyənlər, maşını cərimə meydançasına salınanlar var.
Əslində, bu günün tələb və zərurəti DYP sistemində Qərb standartlarına və modelinə uyğun iş qurmağı tələb edir. Bunun üçün kifayət qədər vəsait qoyulubsa, niyə DYP əməkdaşları ilə sürücülərin birbaşa təması minimuma endirilmir? Dünyanın əksər ölkələri ilə müqayisədə bizim Yol Polisi ən son model avtomobillərdə xidmət aparır. Onların texniki təchizatı ən yuxarı səviyyədədir. Onda isə niyə bu qurum əhalini narazı salmalıdır?
DYP-dən olan narazılıqların boyuk bir hissəsi də yollarda, xüsusilə də respublika əhəmiyyətli traslarda həddindən çox DYP naryadlarının xidmət aparmasıdır. Bir müddət biz araşdırma aparmışdıq ki, təkcə Bakıdan Sumqayıta getmək üçün iki post, 10 yaxın DYP naryadını ötüb keçməlisən. Halbuki, dünyanın inkişaf etmiş ölkələrində minlərlə kilometr məsafəni qət edəndə belə DYP əməkdaşlarına nadir hallarda rast gəlinir. Əvvəllər DYP əməkdaşlarının cərimə yazmağa daha meylli olması onların daha çox pul qazanmaq istəyilə əlaqələndirilirdi. Burada söhbət heç də qanunsuz əməldən getmirdi. Ancaq dərin kökündə bir sosial ədalətsizlik vardı.
Bu günlərdə “Bakı-Xəbər TV”nin studiyasında qonaq olan yol hərəkəti üzrə ekspert Elməddin Muradlı müsahibəsində artıq bu sistemə də yeniliyin edildiyini bildirdi. Bunu bir qədər detallı başa salaq ki, hamı anlasın. Əvvəl DYP əməkdaşı yazdığı cərimələrə görə faiz əldə edirdi. Həmin pul birbaşa onun əməkhaqqı kartına otururdu. Bu səbəbdən də əməkdaş cəriməni çox yazmaqda maraqlı görünürdü. Elməddin Muradlı bildirdi ki, Bakı şəhər DYP-sinin rəhbərliyi özlərinə yaxın olan əməkdaşları daha çox cərimənin yazılması mümkün olan yerlərdə naryad aparmağa təyin edirdi, digərlərini isə yolu tənzimləməyə göndərirdi. Bunun da nəticəsində iki əməkdaşın qazancı arasında kəskin disbalans yaranırdı. Ekspert bildirdi ki, artıq nazir Vilayət Eyvazov bu sistemə yenilik edib və bununla da sosial ədalət prinsipi qorunub. Yenilk belədir ki, əməkdaşların yazdığı bütün cərimələrdən gələn qazanc bir yerə toplanıb, bütün şəxsi heyət arasında bərabər şəkildə bölünür. Bununla da bütün əməkdaşlar, demək olar ki, eyni qazancı əldə etmiş olur. Təqdir olunası haldır.
Məhəmmədəli QƏRİBLİ
