Daxili İşlər Nazirliyində 2019-cu ildə cinayətkarlıqla mübarizənin, ictimai qaydanın qorunmasının və ictimai təhlükəsizliyin təmin edilməsinin yekunlarına və qarşıda duran vəzifələrə həsr olunmuş geniş Kollegiya iclası keçirilib.
Daxili İşlər naziri, general-polkovnik Vilayət Eyvazov bildirib ki, ötən il mütəşəkkil cinayətkarlıqla mübarizə məqsədyönlü şəkildə həyata keçirilib və hesabat ilində 818 cinayətkar qrup zərərsizləşdirilib. Bununla belə, 2018-ci illə müqayisədə ötən il bir sıra cinayətlər azalıb: “2018-ci illə müqayisədə qəsdən adam öldürmələr 5,4, adam öldürməyə cəhdlər 23,4, mülkiyyət əleyhinə olan cinayətlər 12, o cümlədən, soyğunçuluqlar 3,9, quldurluqlar 2, dələduzluqlar 24,3, hədə-qorxu ilə tələb etmələr 25, avtonəqliyyat vasitəsinin qaçırılması faktları 15,5, habelə xuliqanlıqlar 13,4, ictimai yerlərdə baş verən cinayətlər 26, yetkinlik yaşına çatmayanların cinayətləri 30,1, əvvəllər məhkum olunmuş şəxslər tərəfindən törədilən cinayətlər 1,3 faiz azalıb. Eyni zamanda, ağır və xüsusilə ağır cinayətlərin 87, şəxsiyyət əleyhinə olanların 97, onlardan qəsdən adam öldürmələrin 95, adam öldürməyə cəhdlərin 98, qəsdən sağlamlığa ağır zərər vurmaların 94, xuliqanlıqların 93, mülkiyyət əleyhinə olan cinayətlərin 73,4 faizinin, onlardan oğurluqların 65,4, dələduzluqların 94, soyğunçuluqların 84, quldurluqların 86, hədə-qorxu ilə tələb etmələrin 91, avtonəqliyyat vasitəsini qaçırmaların 81 faizinin, eləcə də prokurorluq orqanları ilə birgə keçmiş illərdən bağlı qalmış 329 cinayətin açılması təmin edilib”.
Görünən odur ki, polis orqanlarının səmərəli fəaliyyəti nəticəsində bir sıra cinayətlərin sayı azalıb. Xüsusən də yetkinlik yaşına çatmayanların törətdiyi cinayətlərin 30 faiz azalması ciddi göstəricidir. O baxımdan bunu ekspertlər necə dəyərləndirirlər?
“Bütün bu göstəricilər polisin narahat gecələrinin məhsuludur”
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyevin sözlərinə görə, sadalanan cinayətlərin sayının azalması bir sıra amillərlə bağlıdır: “DİN-in Kollegiya iclasında bir daha bəlli oldu ki, cinayətkarlıqla mübarizə və dövlətin bu yöndə siyasəti kifayət qədər səmərə verən kursda inkişaf edir. Polisin səmərəli fəaliyyəti nəticəsində şəxsiyyət əleyhinə cinayətlərin sayı azalmaqda davam edib. Bura vətəndaşların sağlamlığına ziyan vurma halları, soyğunçuluq, quldurluq hadisələri daxildir. Bütün bu cinayətlərin hamısı azalıb. Cinayət məsuliyyətinə cəlb olunanların sayı da əvvəlki illərə baxanda azalıb. Xüsusən də yetkinlik yaşına çatmayanların cinayət törətməsi halları xeyli azalıb. Cinayətlərin sayının azalması bir sıra faktorlarla bağlıdır. Başlıca faktor şəxsi heyətə verilən təlimatların düzgün olması ilə əlaqədardır. Digər tərəfdən, bu, polisin qarşısına qoyulan vəzifəyə məsuliyyət baxımından ciddi yanaşması ilə bağlıdır. Məsuliyyət həm də polisin öz işinə ciddi yanaşması ilə əlaqədardır. Təbii ki, bütün bu göstəricilər polisin narahat gecələrinin məhsuludur. Başqa bir tərəfdən, əhali arasında profilaktik və maarifləndirmə işinin gücləndirilməsi də cinayətlərin azalmasına öz təsirini göstərib”.
Vidadi ORDAHALLI
