Vilayət Eyvazov Daxili İşlər naziri təyin ediləndən sonra piyadalar üçün keçid olmayan, amma əhalinin gur olduğu yollarda polis nəzarəti gücləndirildi. Belə ki, günün müxtəlif saatlarında, xüsusən də pik vaxtlarda polislər yolu tənzimləyərək piyadaların keçməsinə bilavasitə kömək edirlər.
Bu arada ötən il baş verən avtoqəzalarla bağlı statistik məlumatlar açıqlanıb. Məlum olub ki, ötən il respublika ərazisində 1870 yol-nəqliyyat hadisəsi qeydə alınıb. Nəticədə 821 nəfər həlak olub, 1702 nəfər xəsarət alıb. Bu da 2018-ci illə müqayisədə yol-nəqliyyat hadisələrinin sayının 53 fakt, onların nəticəsində həlak olanların sayının 99 nəfər artması, xəsarət alanların sayının isə 9 nəfər azalması deməkdir.
Ancaq qəzalarla bağlı yayılan statistik rəqəmlərdə diqqəti çəkən məqam ondan ibarətdir ki, piyadaların ölümü ilə nəticələnən qəzalar azalıb. Qeydə alınan ümumi hadisələrin 43,6 faizi piyadaların vurulması ilə bağlı olub ki, nəticədə 329 nəfər həlak olub, 527 nəfər xəsarət alıb. Müqayisə üçün qeyd edək ki, 2018-ci ildə ölkə üzrə 345 piyada qəzada həlak olub. Görünən odur ki, piyadaların ölümü ilə nəticələnən qəzalar azalıb. O baxımdan keçid olmayan yerlərdə nəzarətin gücləndirilməsinin piyada ölümlərinin azalmasında nə kimi rolu olub?
“Piyada ölümləri ilə nəticələnən qəzaların sayını daha da azaltmaq üçün...”
Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, DİN tərəfindən bu yöndə görülən tədbirlər öz müsbət təsirini göstərir: “Təbii ki, görülən tədbirlər və nəzarətin gücləndirilməsi piyada ölümlərinin azalmasına öz təsirini göstərib. Piyadalar üçün keçid olmayan yerlərdə polis nəzarəti artıb. Görünən odur ki, müvafiq qurumların həyata keçirdiyi profilaktik tədbirlər öz nəticəsini verir. Ancaq bütün bunlarla yanaşı, digər faktorlar da var. Məsələ ondadır ki, artıq piyadalar əksər yerlərdə müşahidə kameralarının, DYP əməkdaşlarının olmasının fərqindədirlər. Piyadalar qayda pozmalara yol verdikdə müvafiq tədbirlər görülür. Başqa bir tərəfdən, yol hərəkəti qaydaları ilə bağlı geniş maarifləndirmə işləri həyata keçirilir. İstər DİN tərəfindən, istərsə də KİV tərəfindən bu işlər görülür. İnsanlar yolları keçərkən maksimum diqqətli olurlar. Bütün bunlar, nəticə etibarilə, öz təsirini göstərir. Piyada ölümləri ilə nəticələnən qəzaların sayını daha da azaltmaq üçün mütləqdir ki, maarifləndirmə işlərinin miqyası bir qədər də genişləndirilsin. Orta məktəblərdə, sürətli yolların olduğu ərazilərdə yerləşən obyektlərdə bu kimi işlərin görülməsinə ehtiyac var. Digər bir tərəfdən, piyadaların yolu keçmələri üçün maksimum şərait olmalıdır. Belə şərait olmadığı təqdirdə piyadalar necə gəldi yolu keçməyə cəhd edəcəklər. Ona görə də nəzarətin gücləndirilməsi ilə yanaşı, piyadalara yolu keçməklə bağlı şərait də yaradılmalıdır”.
Vidadi ORDAHALLI
